沉淪多時終見𥌓光 迪利阿里：我要踢2026世界盃！

「我喺我部手機度set咗個reminder，每日11點都會彈提醒：2026年世界盃。」即使已經無落場踢波多時，迪利阿里（Dele Alli）心中依然有團火：「人哋會話，『條友成年無掂波啦喎』，但我唔care，自己知自己咩level。」
仲記得呢個阿里當年金童嗎？已經一年幾冇亮相嘅佢，先前自述因為事業低潮加上童年陰影嘅累積，心理上已經出現問題。今個星期，阿里上《SkySports》電視節目，表明自己希望能夠入選兩年後嘅世界盃，明顯已經準備要重出江湖，擺脫過去嘅黑暗日子。

「的確有過黑暗嘅日子，但都已經過咗去，比自己體驗到咩係恐懼，再將呢啲情況變成正面嘅事。」阿里表示，自己嘅傷患每日都逐少逐少咁好返，確保能夠夏天嘅時候處於最佳狀態，唔會操之過急： 「我而家嘅唯一目標，就係世界盃。」
回想返2018年世界盃，當時喺熱刺做主力嘅阿里，就係修夫基手下嘅英格蘭正選十一人之一，同連加特、軒達臣一齊擔任3-5-2陣式嘅中場。而之後，阿里嘅狀態就開始下沉，對上一次披上三獅戰袍，已經係2019年嘅事，之後嘅歐國盃、世界盃都冇佢份。喺熱刺嘅後期，甚至被當時嘅主帥摩連奴喺成班隊友面前批評話佢懶，自此漸漸被熱刺冷落。

2022年，阿里轉會至愛華頓，但狀態依然無乜起色。被借往土超比錫達斯，情況似乎仲差，2023年2月係佢最後一次嘅職業賽場上陣，之後返到嚟愛華頓，今季一場都未踢過，被放入傷兵名單，靜靜等待今年6月完約。

目前阿里同愛華頓仲有約在身，不過今季仲未亮相，報稱肌肉有傷患： 「好多球員可能會因為夏天合約到期而感到慌張，加上我已經傷咗一年半。不過呢個對我嚟講係一個絕佳嘅機會，show比世人睇我嘅故事。」
世移世易，英格蘭中場已經完成換班，比寧咸、懷斯兩大新星坐穩4-3-3嘅兩個中場鐵膽位，剩低一個位置，尚有文奴、麥迪臣、阿歷山大阿諾等等競爭。

阿里嘅大志未必係天方夜譚，唔少球員經歷低潮之後，都能夠靠自己嘅力量爬返起身，例如出身自愛華頓嘅中場巴克利，今季喺盧頓都打出重生嘅一季。不過，正所謂「人冇事先做到世界冠軍」，阿里要踏上重生之路之前，最緊要都係先照顧好自己嘅心理。