【歐聯十六強】三球大炒拉素晉級 拜仁變陣收到成效｜比賽分析 精選

拜仁慕尼黑二月開始陷入連敗，主帥杜曹（Thomas Tuchel）已經宣佈季尾會放低帥位，但上場德甲意外被弗賴堡迫和後，已經傳出如果週中歐聯被拉素踢出局，杜曹會提早被炒魷魚。幸而，返返主場嘅拜仁以3-0大炒防守甚佳嘅拉素，成功逆轉首回合輸0-1嘅落後局面，杜曹嘅帥位仲喺度，迎向歐聯八強。
由沙利（Maurizio Sarri）執教嘅拉素，今季踢唔出應有嘅進攻流暢性，目前喺意甲排名第9。但取而代之嘅係，今季拉素嘅防守相對穩陣，27場比賽失29球，已經係意甲第5好嘅防守成績。首回合喺主場，防守上處處壓制拜仁嘅主動進攻，令拜仁對拉素圍而不攻，每每殺唔入心臟地帶，終以1球小勝。

連敗潮後，杜曹把心一橫換人，甘美治改打以前曾經打過嘅右閘，將19歲小將柏夫洛域（Aleksandar Pavlović）推上防中位置。同佢拍雙防中嘅哥列斯卡（Leon Goretzka），今場波再唔係後上型嘅中場，而係喺控球之時坐陣後場左側，同兩個中堅喺柏夫洛域嘅掩護之下，實行後場控傳。甘美治唔係飾演「假閘位真中場」嘅角色，而係實實在在踢右閘，同左邊嘅古里路「雙閘齊飛」，解放左右兩翼梅斯亞拿同辛尼，佢哋唔再守實邊路，成日係中路同Half-space出現。變陣的確收到成效，拉素嘅防守陣型大致向後攏撤，為防止拜仁兩翼偷襲後場，少有向拜仁全新嘅後場傳控組合施壓，只係中場艾拔圖偶爾會突前，同中鋒恩莫比利（Ciro Immobile）一齊做少少干擾，兩翼鋒薩加尼、安達臣一直向後企，同域仙奴、根度斯呢pair防中保持緊密。

以「Sarri Ball」聞名於世，拉素教頭沙利都唔係一味死守，喺將風險減到最低嘅情況下，進攻上盡量嘗試採取主動，以域仙奴為陣型中心，其他球員配合，搵出拜仁中後場之間嘅空位。但拉素始終突破唔到拜仁嘅防線，反而喺半場結束前被拜仁一波氣勢連取兩球，總計上半場射門數輸成17比3。換邊後，拉素稍稍回復元氣，但久攻不下嘅局面始終冇改變到，促成沙利60分鐘後大舉變陣，卡達迪入替域仙奴，卡斯迪蘭奴斯入替恩莫比利，兩個中路核心一齊換。但效果未出現之前再一次失守，辛尼內切射門，簡尼跟進執雞，個人梅開二度，拜仁領先到3-0之多。
總比數落後2球，仲有20分鐘，理論上拉素仲有得追。不過，杜曹近日嘅改變的確有改正到拜仁一啲問題，今場嘅變陣收到成效，球員都上下一心要挽回劣勢，成功擊敗拉素晉級。