【歐國盃】臨門一腳被踢出局 威爾斯轉型之路尚待時日 精選

一年幾前世界盃，威爾斯以0-3不敵英格蘭後出局，頂級球星巴爾隨之退役，球隊正式進入新嘅時代，矢志喺呢屆歐國盃重新開始。但今日嘅結果話比大家知，冇咗巴爾嘅威爾斯，注定喺歐國盃嘅大門前，臨門一腳被踢出局。

2024年歐國盃外圍賽附加賽，威爾斯面臨波蘭嘅挑戰依然踢得有聲有色，但法定時間連加時都冇辦法攻入波蘭嘅大門，互射十二碼不敵波蘭，喺自己主場喪失歐國盃嘅門票。
「我冇咗一啲幫助我哋喺歐國盃同世界盃晉級嘅資深球員，正處於過渡期。」威爾斯領隊羅拔佩治（Robert Page）承認，喺巴爾嘅時代過去之後，球隊正面臨改朝換代，但喺呢個困境之下，球隊嘅表現都已經好出色：「只差一個十二碼，我哋就能夠晉級。」

外圍賽喺D組被土耳其、克羅地亞壓過而排名第3，無法直接晉級，以實力嚟睇尚算合理。而身在歐國聯A聯賽嘅佢地，幾可肯定可以有附加賽名額，所以喺三月有復活機會都係意料中事。

不過，主場佈陣嘅佢哋，面對全場0次射門中龍嘅波蘭，都冇辦法成功晉級，著實令人婉惜。值得一提嘅係，呢次係威爾斯男子國家隊史上首次進入互射十二碼階段，只差冇喺主場球迷面前揚威。波蘭五射全中，威爾斯有丹尼爾占士（Dan James）射失最後一腳。而家嘅威爾斯，就係面臨好多球隊都會經歷過嘅轉型階段，前一代嘅頂級球星退落嚟，中間嘅過程總係痛苦難行，既要承受過去嘅成功所帶嚟嘅壓力，又要面對佢哋實力的確唔太強嘅現實。

自從世界盃出局以嚟，佩治一直有努力為球隊帶嚟改變，以年輕嘅球員作為骨幹，帶嚟更多活力。
事實上，喺巴爾未退役、藍斯未退化之前，威爾斯比較年青嘅國腳，都已經令人有所期待。以今場波嘅正選陣容為例，翼衛尼高威廉斯、翼鋒丹尼爾占士、哈利威爾遜、防中安柏度等等中生代球員，都有嘅英超大會踢波嘅經驗。甚至連藍斯呢位元老級人物，喺呢場一場定生死嘅比賽都冇得出場，反證佩治對佢哋有幾信任。
上述一班年輕球員天賦異稟，但仍然需要耐性，先可以帶嚟成就。威爾斯接著落嚟嘅路，就係忘記巴爾嗰代，建立全新嘅球隊。

一次嘅失敗，唔等於呢一年嚟嘅努力劃上句號。「未來會繼續徵召年輕球員，喺每個位置形成競爭，建立出踢法。」佩治好清楚自己條路要點行。