昔日金童將近回巢 - 半季夠唔夠多蒙特tune返好辛祖？ 精選 推薦

冬季轉會市場一開始，就傳出多蒙特會向曼聯借用辛祖（Jadon Sancho），比呢位昔日金童返返到德甲成名地，尋求生涯重新起步嘅機會。到1月8號、9號，轉會大神Fabrizio Romano煞有介事連推兩個Twitter，暗示交易應該就快成行。

辛祖2021年加盟曼聯，兩年半時間，兩個字形容：低迷。嗰時曼聯追咗佢幾年，£72M轉會費已經比平咗，加埋C朗嘅回歸，辛祖本應係曼聯爭冠軍嘅即時戰力，但發展不如人意，全季陷入混亂。到2022年坦赫登陸奧脫福，球隊由頭到尾執正個form，一季時間就完成重整，但辛祖唔係重要嘅角色。甚至同坦赫（Erik ten Hag）將帥不和嘅傳聞甚囂塵上，今季上半季冇得出場。