【惡鬥曼城】利物浦首要目標：鬥搶，搶得狠過對家 精選

上季一場「榜首大戰」，令曼城後來居上，搶返阿仙奴榜首位置，一直帶到季尾。而今季「榜首大戰」，就回歸返利物浦同曼城之間嘅巔峰交對決，星期六早場一觸即發。
目前英超過咗12輪，曼城以9勝、1和、2負嘅成績排緊頭位。失分嘅三場波，對陣嘅球隊都勇於同曼城喺中場鬥搶，以作客阿仙奴輸1-0嘅比賽為例，阿仙奴完完全全限制咗曼城喺中場開始組織攻勢，迫使曼城更加接近底線。而國際賽期前，曼城同車路士惡鬥成4-4，車仔喺中場佈陣，壓制曼城組織嘅心思，相當值得其他球隊參考。
不過，加埋比狼隊絕殺嗰場波，曼城今季英超三次失利，都係作客時發生。要打破佢哋主場勝率100%嘅紀錄，希望就交喺利物浦身上。

據Opta嘅統計，英超前12輪嘅比賽當中，利物浦透過反搶球權而直接進入對手三閘線嘅次數係209次，數據為列英超之首。呢一點唔太意外，高普近年喺英超同歐聯嘅佳績，有賴於佢成功砌到一支以中前場施壓直接反擊作為戰術主軸嘅球隊。而由上季開始，利物浦開始面臨人腳嘅轉換，上一代中場球隊喺今季已經全數離隊，反而新加盟嘅中場球員能夠迅速適應，為球隊延續呢個DNA，令佢哋有本錢同曼城一決高下。

國際賽期前，利物浦主場以3-0大勝賓褔特。嗰場波缺陣嘅後衛高美斯、干拿迪、中場鍾斯、加雲貝治呢四位球員，近日已經完全復操。唔計長期傷兵羅拔臣同泰亞高，利物浦可以全陣出擊對付曼城。有別於車路士對曼城嗰場4-4，利物浦唔似得車路士，有高質素嘅防守中場卡些度，去保護墮後核心安素費南迪斯。法賓奴離開後，利物浦兩個防中心水，都比車路士截走咗，由德甲加盟嘅日本國腳遠藤航，只係利物浦用嚟應急嘅人選，由上半季嘅出場次數可以見得到，佢嘅質素仲未足以喺英超做長遠嘅主力。

利物浦今季中場嘅安排，都係以麥亞里士打做墮後核心，前面擺上蘇保斯禮同另一名中場，並以推高後防線嘅方法，避免中場、後場之間曝露空位。比起車路士，利物浦中場雖然比較空虛，但勝在後防線質素超班。而右閘阿歷山大阿諾喺組織時內收中場嘅戰術角色，今季做得愈嚟愈成熟。
以上所述，都係利物浦喺今季喺人腳調整嘅過程之中，依然能夠同曼城拉成均勢嘅原因。