【峰迴路轉】補時十二碼扭轉劇本！歐聯死亡之F組形勢整理 精選

死亡之組果然係死亡之組！小組賽打到中段後段，一個入波，乃至一個判決，都可以改變一支球隊喺歐聯前路嘅命運。
週中舉行嘅歐聯小組賽第5輪，被稱為「死亡之組」嘅F組，四隊球隊賽前都係各差1分，隊隊都有機會晉級，隊隊都有機會出局。4輪以4分排第四嘅英超代表紐卡素，作客6分排第二嘅巴黎聖日耳門，憑上半場伊薩嘅入波，將一球嘅領先優勢一路帶到落尾。

而同一時間舉行嘅另一場比賽，4輪以7分排榜首嘅多蒙特喺客場比賽，70分鐘以3-1嘅優勢，領先5分排第三嘅AC米蘭。喺兩球差距之下，兩軍喺末段依然保持互有攻守嘅局面，贏輸局面基本上都慢慢定型。

如果呢個比數維持到最尾，咁多蒙特就篤定首名晉級，而紐卡素就會升到第二名，搶佔埋晉級歐聯淘汰賽嘅主動權，只要最後一輪贏埋AC米蘭，就確定小組次名。對巴黎嘅比賽尾段，主帥艾迪賀維不變應萬變，冇做任何嘅換人調動，以維持成場比賽以嚟，被巴黎狂抽二十幾球依然保持不失嘅局面。
眼見進入補時8分鐘，紐卡素只要守埋佢就ok，但點不知，最唔想見到嘅事喺補時都係發生咗。當時丹比利傳中，斬中紐卡素後衛利華文圖身彈，再彈中手㬹。球證睇完VAR判十二碼，麥巴比冷靜一抽，了結紐卡素死守全場嘅努力。

利華文圖一個唔為意嘅起㬹，令紐卡素前功盡廢，最後嘔返兩分出嚟。米已成炊，紐卡素五輪過後只能以5分排第三，僅僅以對賽成績壓過同分嘅AC米蘭，更陰公嘅係，佢哋失去咗出線嘅主導權。
一個十二碼，令巴黎起死回先。12月中嘅煞科戰，紐卡素咁啱會對上米蘭，兩支球隊唔會一齊拎三分，亦唔會一齊捧蛋。咁表示，而家以7分爬上第二名嘅巴黎，至少會取得歐霸資格。當然，巴黎最理想就係打贏多蒙特，但如果和波的話，就要寄望紐卡素唔好贏AC米蘭。因為同分要計對賽成績，巴黎會爬米蘭頭，但會被紐卡素壓過。

而最後，紐卡素同AC米蘭之間，喺煞科戰就會上演保住歐洲賽席位嘅生死大戰。雙方首輪0-0和局，而而家歐聯已經冇作客入球優惠，而家手握4球得失球差嘅紐卡素會喺同分嘅情況領先排名。不過，和波嘅話兩邊都冇歐聯踢，而贏咗嗰一方，仲要睇巴黎嘅面色做人，先決定到邊隊晉級淘汰賽，邊隊跌落歐霸盃。

你又點估到，開局兩場不勝只得1分嘅多蒙特，之後竟然連贏三場，而家提早篤定晉級資格，最後一場仲要輸比巴黎至少2球，先會嘔返個首名出嚟，成為最後大贏家。