多踢兩人卻圍而不下，熱刺該為呢場勝仗感到羞恥 精選

多打兩人之下，熱刺對陣利物浦嘅5-3-0防守陣式依然久攻不下，最後僅僅靠對手一個解圍失誤而成嘅烏龍波，先至喺補時最後一分鐘絕殺。

面對3個不利己方嘅判決錯誤，利物浦身在逆境迎難而上，鬥志可嘉。而作為勝方嘅熱刺，應該以呢場勝仗為恥。

以全場壓迫成就功名嘅高普，對上死攬球權嘅普斯迪高古，上半場前半嘅大戰，雙方你爭我奪，紅白激戰相當精彩。熱刺後場組織無懼利物浦陣型靠前嘅施壓，以比素馬嘅抗壓能力，快速連結後場同中前場。另一方面，利物浦右閘高美斯，喺組織時會踏前到六號位，同麥亞里士打平排，將鍾斯、蘇保斯禮推得更前，拉開空間比沙拿、迪亞斯發揮速度，撕開熱刺防線。但利物浦中場居迪斯鍾斯喺26分鐘嘅紅牌，成為比賽走向嘅第一個轉折點。當時比素馬想用小技術做駁腳，鍾斯攔截先中波後中腳，本來就唔算係惡意犯規，卻被Hooper覆核VAR後直紅趕出。
利物浦改打4-4-1而失去全場迫搶嘅能力，卻能夠靠一次沙拿同迪亞斯配合突擊妙傳妙射入網，但今次旁證舉旗後，VAR竟然冇劃線，亦都冇向Hooper提出推翻判決，白白摧毀迪亞斯先開紀錄嘅一球。

而68分鐘，前鋒祖達同熱刺後衛烏度治爭波，烏度治自己kick親跌低，Hooper嘅判決再引眾怒，判定祖達出腳在先比黃牌，間接引致1分鐘後祖達再領黃，而兩黃一紅出場。
整整3個錯判，令利物浦失去比分優勢之餘，仲踢少兩個人。但呢個時候，先係利物浦打出精采死守戰嘅開始。高普好快就調整好心態，接連換上遠藤航、干拿迪、阿歷山大阿諾等後防， 5-3-0屯兵禁區。偶爾有左閘羅拔臣、中場加雲貝治等人喺邊路搏得零星反擊嘅機會，但都係見好就收，唔同人多勢眾嘅熱刺硬碰，以守住1分為目標。

儘管熱刺多打兩個人，但缺少高大球員同優質射手嘅佢哋，喺陣地戰都係難以攻克利記鐵桶。為此，有人數優勢嘅佢哋更應好好利用廣闊嘅球場空間，一步一步將利物浦中路球員往邊線挪移，再藉利物浦冇前場球員去填補禁區前嘅空洞之際，令韋利斯、靴爾堡等後上嘅球員建立人數優勢。
但偏偏佢哋做唔到呢一點，特別係古路錫斯基、沙洛文兩翼同其他球員打唔出具機動性嘅配合，令中路球員冇空間去接波，身體對撞又比唔上馬迪普、雲迪克等人，對利物浦圍攻而不下。利物浦愈守愈勇，多次包波清波眾志成城，要喺呢場絕對逆境之中守住和局。

偏偏，人算不如天算，樸羅喺補時第5分鐘橫傳，馬迪普趕得上解圍，但唔小心踢咗入自己龍門，死守25分鐘嘅付出化為烏有，令熱刺全取三分。

受球證誤判折磨，以致領下兩張有爭議嘅黃牌，更被偷走足以奠勝嘅入球。利物浦呢場輸波，但已贏盡人心，更襯託出熱刺多踢兩人下嘅無能。