【國家打吡】沙維果斷變陣！巴塞絕殺皇馬領先12分 精選

絕殺贏國家打吡，喺西甲榜首領放12分之多，以巴塞隆拿近日（乃至近年）咁低迷嘅氣氛底下，終於有個可以大肆慶祝嘅理由。

專門用嚟mark實皇馬左翼雲尼素斯嘅阿羅祖，今場波唔好彩先自隊烏龍，但羅拔圖、基斯爾上下半場末段先後入波，以2-1擊敗死敵皇家馬德里。巴塞賽前有柏迪、丹比利呢兩個主力缺陣，偏偏喺翼鋒同中場嘅配置上，巴塞領隊沙維所做嘅變動，都為球隊帶嚟奠勝嘅契機。