史迪連利慘成熱刺替死鬼 球隊墮落遠因深植多年 精選

遇上大事件，第一件事搵人祭旗，而唔係正視問題核心。呢種管理方式，香港人應該司空見慣，而遠在倫敦嘅英超球隊熱刺，呢幾年嚟都重覆緊同一個輪迴。

五個失球，喺唔夠半個鐘內發生，熱刺北上作客紐卡素變陣四後衛，大敗1-6，聖占士公園球場風聲鶴唳。「我哋可以見到好多原因，而我本人、董事會、教練團同球員都要一齊承擔責任，尤其是我。」賽後熱刺班主利維直斥表現不能接受，直接解僱臨時領隊史迪連尼（Cristian Stellini）同其他干地帶過嚟嘅教練團成員，由賴恩美臣（Ryan Mason）再次出任臨時領隊。