【利記vs曼城】新賽季首次碰頭 - 稍有褪色，精彩依然 精選

好多球迷都有感覺，近年嘅英超，已經變咗曼城同利物浦嘅「雙頭馬車」。而往績可以大概引證呢個講法，過去六年嘅英超，利物浦佔其一，曼城佔其五，而當中更有兩個球季，利物浦迫到曼城貼一貼，絲毫不得鬆懈。

就算上季換成阿仙奴同曼城爭冠軍，利曼紅藍大戰一啲都唔失色。
2023-24賽季嘅首回合對碰，兩軍都面對各自嘅問題。利物浦喺上一代中場球員全部離隊之下，今季加速重組陣型嘅步伐，由蘇保斯禮、麥亞里士打組成新嘅中場核心，加上改變左右閘喺進攻時嘅配置，喺球隊部份核心球員如雲迪克、沙拿面臨老化之時，依然能夠加強球員嘅壓迫同傳控。

鋒線上，為利物浦連奪歐聯、英超嘅「埃及文明」，如今只剩下沙拿一人留隊，同祖達、紐尼斯、迪亞斯、加普，三個鋒線位置由五個人負責，高普亦一直搵緊最佳組合。

曼城貴為歐洲三冠王，手執當代最強中鋒夏蘭特，兼有杜古、高華錫等等強援加盟，理應可以延續氣勢。但開季第一場，就傷咗中場靈魂人物迪布尼，創造力無可避免會打折扣。不過，迪布尼嘅受傷，無礙哥迪奧拿今季嘅變陣，當中最大特色就係安排前鋒艾華利斯打後半格，喺攻中同輔鋒兩個位置之間遊走，喺球隊組織時加入中場支援，防守時就喺夏蘭特身後壓迫。哥迪奧拿能夠用陣型同人腳嚟解決失去迪布尼嘅問題，曼城球迷最需要擔心嘅，係夏蘭特今季嘅傷情。月頭對般尼茅夫半場被換走，近日喺挪威國家隊嘅友誼賽又遭受腳傷，一向身體健康嘅夏蘭特，今季已經兩次有健康方面嘅疑慮。

上季英超攻入36球，金球奬勇闖三甲，夏蘭特。英超12場入13球，歐聯4場入4球，夏蘭特開季三個月，依然保持住場均至少1.0入球嘅數據，威力依然恐怖。目前尚未知呢位挪威神鋒會唔會喺對利物浦嘅大戰上陣，喺利物浦今季都求變嘅情況下，用人腳質素拆解雲迪克為首嘅防線。
12輪聯賽過去，英超排行榜前兩名都仲係曼城同利物浦，帶入球、失球、xG值等等，兩隊都位列英超前三之中。唯獨比較大分別嘅係把握力，+7.6嘅預計入球差位列英超第一，代表佢地嘅把握到比預期得多嘅機會。但利物浦就調返轉，喺總射門數比曼城多嘅情況下，預計入球差竟然係-1.5，位列英超中間位。如果射門選擇未調整好，利物浦就難以同曼城一爭高下。

無論時代點變，無論競爭幾大，只要哥迪奧拿同高普一日喺度，英超一日都唔怕悶。