列陣英格蘭「中場」身份 阿歷山大阿諾：自己過半數時間打中場！

由出道開始，阿歷山大阿諾作為右閘，喺利物浦已經打響名號，年紀輕輕已經以主力身份，為球隊奪得歐聯、英超冠軍。然而，經過領隊高普嘅調整，阿歷山大阿諾近年愈嚟愈常見喺中場位置出現，平衡返喺防守上嘅不足，同時更突顯佢造波嘅能力。
近幾次英格蘭大軍，阿歷山大阿諾都有入選，但名單上就以「中場」嘅身份列陣，而唔係一向認知嘅「後衛」。當然啦，國家隊公佈大軍，從來都冇限球員一定要跟返自己個位置去排，完全取決於於各國足總嘅做法。又例如德國隊，多年以嚟每次喺國際賽期前公佈大軍嘅時候，都會將中場同前鋒呢兩個類別混埋一齊。

但將阿歷山大阿諾塞入「中場」類別，就係一個脫離常規嘅做法。似乎係表示緊，佢嘅英格蘭國家隊嘅定位，未來會慢慢向中場靠攏，就正如佢近幾季喺利物浦嘅發展一樣。
對於呢項改動，佢本人都表示歡迎嘅態度，同領隊同教練團都有傾過：「我會用呢個方向去訓練，上次同澳洲比賽，我都係咁做，又真係幾幫到我。返到球會，我唔會個個星期都咁踢，但有時都會喺球場中間位置上腳，學習點樣去現位攞波，點樣去控制自己嘅企位。」

根據sofascore嘅熱點圖，阿歷山大阿諾嘅活動範圍，由只靠近球隊右邊，到近幾年愈嚟愈多喺中場偏右嘅位置出現。「球隊控球在腳嘅時候，我企喺中場。球隊冇波嘅時候，我企返右閘。我已經有過半數時間，甚至少60%時間係打中場，所以啲人對我企喺球場中間位置嘅印象，愈嚟愈深刻。」

足球位置多元發展， 曼城、阿仙奴等等頂級球會，都已經習慣將閘位同防中呢兩個位置之間嘅分野模糊化，甚至今季阿仙奴陣容，完全冇以黐住邊線作為主力踢法嘅閘位球員在陣。睇返利物浦，之前幾季攞冠軍嗰陣，羅拔臣同阿歷山大阿諾「雙閘齊飛」，而家進攻時就會將防線向右傾，羅拔臣收入去形成三中堅，將阿歷山大阿諾推前一格，同麥亞里士亞打形成double-pivot造波。
「對我嚟講，重點係攞波之後有更大嘅自由度，推進皮球同創造攻勢。」對於近幾季嘅發展，阿歷山大阿諾形容，自己有更多機會去為球隊創造攻勢，從而贏波。