兵敗聖占士公園 普捷天奴嬲到爆：今季最差嘅一場波 精選

領隊喺記者面前狠批球員，對將帥關係點都會有影響，猶其是新官上任，團隊關係未建立好就開火，好容易招致人心不和。但如果表現真抵鬧嘅話，作為球員都冇得駁啲咩，只求知恥近乎勇，下次踢返場好波。

「我哋未準備最好狀態去競爭。」作客聖占士公園被紐卡素以1-4痛擊後，車路士領隊普捷天奴（Mauricio Pochettino）不留情面，公開批評球隊嘅表現。
過去5場比賽，車路士只贏一場之餘，失球數更多達1球。十一月國際賽期前，四場比賽都至少可以用對手拉成相對嘅均勢，主場迎戰曼城一役更加成功絕殺迫和4-4。但今場作客紐卡素，就係完完全全被技術性擊倒。

「睇吓啲強隊，個個星期，甚至每三日出賽一次都係踢得咁好，呢個係我哋球隊需要建立嘅精神。」

喺防線前嘅佈置，都係車路士今季防守嘅隱患。今季車仔最常上陣嘅三個中場中/防中球員之中，加拉加位置踢前半格，主要負責對對手中後場壓迫，而安素費南迪斯本身就係需要隊友掩護嘅類型。今季新買嘅天價新援卡些度，雖然具備一定質素，但磨合需時。
更何況，今場對紐卡素冇出卡些度。而防線上， 因應高維喺國際期前夕受傷，左中堅位置放上巴迪亞舒利，佢上季季中加盟，但今季只踢咗60分鐘盃賽。

「失咁多波，表示我哋要更專注。今日嘅失波實在比對手太易入，我哋成日都有檢討呢點，嘗試喺防線上做得好啲。但呢個問題唔單止同防線有關，而係成team人嘅表現都有關。」
普捷天奴嬲得有道理，但目前防線上嘅佈置，可以再比多啲時間觀察，唔需要因為一時失利，而否定普捷天奴今季嘅組軍計劃。以高維、列斯占士為核心嘅嘅防線，喺組織同突破方面都有唔少潛力。呢個體系成型之後，再幫泰亞高施華搵到適合嘅接班人，同埋增加板凳深度，就可以放眼收成期。

但做到呢步之前，就要用時間砌好新嘅體系，打出最基本嘅競爭力先。車路士唔止輸比數，進攻端上僅僅0.5嘅xG值，更加係創本季新低。球隊7次射門，幾乎全部製造唔到威脅。單靠反擊嘅套路行唔通，普捷天奴唔係冇試過改變，下半場換上梅迪歷、保查等等球員，試圖增加中前場嘅控制力，但變陣後幾分鐘就踢少個，變嚟都冇用。

「呢場波係我哋今季最差嘅比賽。」輸成1-4，作為領隊嘅普捷天奴都唔客氣。