九年大起又大落 李斯特城神奇歷史走到終章

短短9年，6次以前十完成賽季，3次取得歐洲賽席位，更已經完成奪冠大業，一度有能力長駐英超前列。李斯特城喺英超嘅神奇之旅，未能達到十年嘅里程碑就提早結束，煞科一役贏過韋斯咸2-1，但為時已晚，護級對手愛華頓同日贏波，李城贏幾多都冇用，來季要降班至英冠作賽。2021年高捧足總盃冠軍，2022年仲踢緊歐洲賽四強，2023年就要宣佈來季英冠見，李城嘅變化快得令人窒息。
唔似其他護級份子，李斯特城絕對係一支有野心嘅球會。主導球隊嘅王權集團，前班主維猜（Vichai Srivaddhanaprabha）幾年前空難離世，四子艾也屈（Aiyawatt）接手繼承，延續球隊喺英超聯嘅野心。但球隊多筆引援，唔能夠換嚟穩定嘅成績，而因為上一季嘅轉會操作未如前季理想，連同先前嘅續約同簽人，令到佢哋嘅薪酬架構佔咗球隊唔少開支，加上訓練場同球場嘅支出，李城嘅財政負擔實在太大，間接導致今日要降班嘅困局。

上一季歐協佢哋攞唔到冠軍，聯賽又以4分之差失落今季歐協席位，令佢哋冇得藉歐洲賽取得額外收入。就算有科芬拿呢單價值£75M嘅溢價轉會，都唔足以令佢哋喺夏天嘅轉會市場有大動作，甚至要賣出無意續約嘅隊長卡斯柏舒米高，以換取佢剩餘少少嘅轉會價值。扶正後備門將丹尼獲特，門將質素嘅下降，直接導致季初失分連連。
主帥羅渣士（Brendan Rodgers）開季手執嘅陣容，好聽啲講就是磨合多時默契非凡，難聽啲講就係了無新意毫無寸進。華迪高齡36歲，全季仲要頂37場，全季只得3球4助攻。蜀中無大將，廖化作先鋒，本應要接班首席射手大位嘅達卡、伊軒拿祖，兩人今季入球合計唔過10球。惟獨哈菲巴尼斯、占士麥迪臣呢兩位進攻主將盡量撐起球隊，來季被其他英超球隊招手在所難免。

2016年聯手寫下英超傳奇一頁，當年陣容如今僅剩華迪、艾伯禮頓在陣，陪同球隊奪冠同降班，教人唏噓不已。但李斯特城呢段時間以嚟嘅努力，足以長久地烙印喺呢一代球迷心中。期望佢哋認清前路，東山再起嘅一日，英超球迷心中永遠有佢哋嘅一席位。