主力箭頭各倦勤 曼聯戰拖肥「頹鬥頹」 精選

英超兩連敗後，今個星期曼聯返返主場，如果連愛華頓都贏唔到的話，歐聯位置就岌岌可危，坦赫嘅帥位都係一樣。
上半季首循環嘅比賽，曼聯西進作客，喺葛迪遜公園以3-0狂風掃落葉，時為十一月，即係曼聯今季打得最好嘅時期。但以兩邊近績嚟講，呢場波都係「頹鬥頹」，這邊廂曼聯英超兩連敗，那邊廂愛華頓喺聯賽6場不勝，而且兩方都有主力前鋒倦勤。

愛華頓嘅卡法路雲，因為腿筋傷患已缺陣一個月，未有咁快復出。今季戴治用中場杜古利打影子前鋒嘅體系，暫時用副選前鋒比圖同佢夾，呢位英超新人只係入咗2球波，成效麻麻。

而曼城把握力最好嘅前鋒賀倫，全季聯賽攻入7球，啱啱獲選為英超二月最佳球員。可惜，呢位最佳球員而家喺傷兵名單之中，已經三場比賽冇出戰，最新嘅報導係傷情尚待觀察，對愛華頓上陣成疑。而冇咗呢位隊內最佳射手，曼聯勉強用上拉舒福特打箭頭，係冇辦法之中嘅辦法。上場「曼市打吡」作客曼城，領隊坦赫變陣應對，喺上半場防守佈陣非常成功，只係可惜維持唔到落去下半場，領先1球倒輸3球。嚟緊嘅對手愛華頓，實力同曼城相距甚遠，曼聯理應能夠以更強嘅姿態進行壓制，係睇坦赫想唔想再進取少少。

中場小將文奴季中開始搶得正選主力位置，正正就係首循環對愛華頓受到坦赫提拔，為曼聯中場注入唔少拼勁同活力，協助球隊打出3-0嘅勝仗，而家返到主場故技重施，期望喺攻守兩端都有貢獻。但新嘅中場組合，能唔能夠改善曼聯嘅防守問題，就要再睇睇先。數據嚟講，通常被定義為「強隊」嘅球隊，防守上通常唔會比對手起腳太多次。27輪英超後，以今季三強鼎立嘅形勢嚟，場均被射正最少嘅球隊分別係阿仙奴（2.26次）、曼城（2.89次）、利物浦（3.48次）。曼聯今季被射正5.0次，排喺第12名，甚至嚟緊呢場波嘅對手愛華頓（4.15次）都比曼聯少。咁代表唔止奧拿拿實力參差，全隊防守佈置都需要檢討。
講咗咁耐，都係想講就算曼聯傷兵滿營，排面上對愛華頓依然係充滿優勢，但穩定性不足始終係曼聯今季最大嘅缺點。唔講遠嘅，上兩個星期主場打富咸，被對手補時一球絕殺，奧拿拿完全無撲戈救動作，輸得令人滿頭問號。不過，講個數據，甩轆頻頻嘅奧拿拿，今季嘅撲救率（73.3％），比碧福特仲要高出少少（71.37）。

「頹鬥頹」，一場好波就難以期待，只望球員各自有令人眼前一亮嘅發揮。