中場靈魂查漢奴古 - 壓制反擊再反擊，1-0痛擊馬體會 精選

週中歐聯比賽，兩支主打三中堅陣式嘅球隊對壘，國際米蘭主場1-0小勝馬體會，取得首回合先機。奧地利前鋒阿拿杜域（Marko Arnautović）做完罪人做英雄，末段一箭定江山，但土耳其中場查漢奴古（Hakan Calhanoğlu）嘅發揮，更值得大家關注。
有別於常規嘅高位迫搶，國米今場波陣型靠後少少。作為陣型圖上嘅三中場嘅正中央，查漢奴古有更大嘅自由度，去迫搶馬體會嘅墮後中場，反過來控制馬體會嘅節奏。負責控制中後兩線闊度嘅查漢奴古，對喺國米中後兩線之間竄擾嘅基沙文，亦造成唔少干擾。

進攻上， 墮後嘅查漢奴古位置稍稍右傾，左中堅巴斯托尼、右中堅帕華配合上前，試圖喺halfspace位置overload馬體會嘅側翼。然而，呢個做法被馬體會有效壓制，原因在於施蒙尼自上場西甲以嚟嘅變陣。中場工兵洛蘭迪，近日開始離開右翼衛位置，被推上去同前鋒共組第一度防線，令馬體會呢場波有四個本質為中場中路嘅球員同場正選，面對對手嘅側擊，都能夠好快喺危險嘅地帶補充到人手。
但有得必有失，本質上踢少一個前鋒嘅馬體會，進攻上極度依賴兩翼衛嘅拉邊，再傳中尋找進攻點。基沙文上陣78分鐘錄得0射門，表現失色。

中場激戰上半場，換邊後雙方各自作出一個位換位嘅調動，馬體會再喺54分鐘換入莫拉達，加多個前鋒加強傳中威力。但國米對球權掌握得更大，火力更見旺盛，對馬體會嘅反擊處處壓制。重奪球權後，再靠查漢奴古嘅一腳傳球，將攻勢推返去馬體會嘅半場。
就咁樣來來回回，形成呢場歐聯嘅激戰。後備入替嘅阿拿杜域，幾次門前失機後功敗垂成，射入領先嘅一球，1-0進入次回合。中場球員喺防止馬體會反擊方面做得唔錯，尤其是巴利拿、查漢奴古被攔截之後迅速反搶，令馬體會嘅反擊被抹殺於萌芽之中。

由干地到細恩，國米呢幾年掘起嘅三中堅陣式身前，有克羅地亞防中保素域掩護。以攻中起家嘅查漢奴古轉到國米後，位置愈踢愈後。上季喺保素域受傷之際，細恩起用查漢奴古打後一格，將中場防守嘅重點，擺喺更落力嘅反搶之上。保素域今季轉投沙職聯，查漢奴古、米希達恩、巴利拿呢個中場三角，鐵膽位置更加穩固。