進行中的塔吉克聯賽,國家隊成績如何?

Chris的角球生物 於 12/04/2020 發表 收藏文章
原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/

因為對外宣稱武漢肺炎「零確診」,中亞國家塔吉克斯坦於4月5日照常開踢第29屆超級足球聯賽。大家聚焦於佢地聯賽嘅同時,可以了解下佢地國家隊嘅戰績到底強唔強。

係蘇聯解體之後,塔吉克國家隊係1992年6月17日同烏茲別克斯坦踢咗佢哋史上第一場比賽,結果以2比2賽和。係1994年,佢哋嘅足球協會先至被FIFA承認,所以直至同年4月11日先第一次踢正式賽事。佢哋首次踢嘅大賽係1996年阿聯酋亞洲杯外圍賽,原本同巴林、烏茲別克斯坦同組。後來巴林退出,首場賽事塔吉克係主場4比0力克烏茲別克,看似晉級在望,可惜次回合係補時階段失波,大敗5比0,只差一步就可以第一次參加外圍賽就晉級決賽週。
係2002年日韓世界盃外圍賽,佢哋喺主場大勝關島16比0,創下國家隊最大比分勝利紀錄。同期外圍賽,佢地只係小負伊朗兩球。2006年世界盃外圍賽,佢地係主場迫和小組首名、之後參加洲際附加賽嘅巴林。2006年,佢地國家隊嘅成績迎來一個小高峰,係決賽4比0大勝斯里蘭卡,奪得亞足聯挑戰盃冠軍

近年來,國家隊成績有所下滑,2018年世界盃同2019年亞洲盃外圍賽(例如客場輸也門,主客場都輸比菲律賓)成績都令足協不滿。2018年,足協決定請嚟烏茲別克主帥Usmon Toshev。佢地係2022年世界盃外圍賽隨即有亮眼表現(例如主場擊敗吉爾吉斯斯坦),不過作客爆冷輸比緬甸,目前只係排小組第三,令佢地陷入困境。

睇番佢地最近嘅比賽陣容,有超過七成球員都有效力國內班霸伊提洛爾(FC Istiklol)嘅經歷。簡略講下佢地嘅歷史同戰績,係2007年成立,係未夠13年嘅歷史入面就贏過8次頂級聯賽冠軍、8次塔吉克杯冠軍,2012年贏過亞足聯主席杯。佢哋嘅球員實力某程度上可能決定咗國家隊戰力。係2010年奪得全國MVP嘅球員Yusuf Rabiev就係2003-15年間為國上場40次入15球,同年奪得全國最佳後衛嘅Eraj Rajabov就依然踢緊國家隊,2008年至今踢左44場。

有一位4度效力FC Istiklol嘅球員係2014年接受FIFA採訪,被譽為「塔吉克嘅C朗拿度」,佢就係29歲中場Nuriddin Davronov。15歲開始就加入塔吉克U17,17歲就升上一隊,目前為止幫國家隊踢左49場入8球,對敘利亞同巴勒斯坦呢類強敵都有入波,無疑係國家隊關鍵球員。
Nuriddin Davronov接受FIFA採訪,談及對自己前途發展嘅願景
影片來源:https://www.youtube.com/watch?v=EJqF5idXZE4

塔吉克足協係佢地官方YouTube channel都有上載影片,專門介紹呢位球員嘅專長同特點。佢有快速變向嘅能力,控波控得好穩,鍾意用腳法過人,可以被視為反擊嘅一大利器。佢曾經係2012年外流塞爾維亞同埋2016年外流保加利亞,最近就轉左去印尼甲組球隊效力。
影片來源:https://www.youtube.com/watch?v=8px16byEEog

講下塔吉克國家隊前場一位希望之星,年僅19歲嘅前鋒Sharom Samiyev。佢係19-20年間效力國內班霸FC Istiklol,踢18場入4球後,就得到俄超球隊魯賓卡山(Rubin Kazan)嘅招徠。佢係19年開始踢國家隊,處子戰就入波,未來有可能成為絕對主力。

順便講下塔吉克U17國家隊,名氣可能仲大過成年隊。佢地係2006年就參加亞足聯U16錦標賽,2007年首度晉身U17世界盃,仲可以晉級到十六強。2018年佢地係亞足聯U16錦標賽淘汰南韓,只係一球小負冠軍日本,係創下隊史佳績嘅情況下再度晉級U17世界盃。兩屆U17世界盃佢地都有勝仗,2007年4比3贏美國,2019年1比0贏喀麥隆。睇返近期戰績,大炒科威特9球,對伊朗都可以贏3球,睇得出佢地嘅青年隊已經算係亞洲一流。
2019年塔吉克係U17世界盃擊敗喀麥隆
影片來源:https://youtu.be/gP5jUcYisek
筆者覺得,如果多d塔吉克球員趁年輕爭取多啲外流機會,同埋足協幫手提升國內聯賽強度,塔吉克成年隊同青年隊嘅戰績或者可以貼近d。當然,佢地嘅青年隊有能力持續參加大賽,或者就可以幫多d球員外流,提升成年隊嘅戰力。以參加過2007年U17世界盃,對美國有入球嘅中場Fatkhullo Fatkhuloev為例,佢自2007年就升上成年隊,目前踢左68場入9球,係現時國家隊最有經驗嘅球員,亦係歷史上出場最多嘅國家隊成員。佢效力左10年FC Istiklol,2019年終於有機會外流去烏茲別克。如果佢早d有機會外流,能力或者會更上一層樓。
圖片來源:https://images.daznservices.com/di/library/GOAL/52/4/tajikistan-football-team_d6pt41wyd3j41uosblro8xct5.jpg?t=-981576021&w=3821&h=2149

呢次疫情,令冷門國家嘅足球突然備受重視,例如塔吉克。睇佢地青年隊嘅戰績,確實值得令人抱有希望,但點樣令青年球員能力可以持續提升,係國家隊教練需要考慮嘅重要課題。現時國家隊同U23都係由同一位教練Usmon Toshev執教,可能係令國家隊風格「由下而上」成型嘅一步掛?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→