《買捷維爾定泰利斯?車路士補強的詳盡分析》

Chris的角球生物 於 08/03/2020 發表 收藏文章

原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/

筆者最近係某Facebook專頁睇到一篇車路士對波圖左閘泰利斯(Alex Telles)有興趣嘅報導,唔少球迷留言都指買泰利斯會好過捷維爾(Ben Chilwell)。筆者就嘗試分析兩位球員嘅特質同埋可以對車路士發揮咩作用。

太陽報係3月初有篇報導,指李斯特城好可能會用般尼嘅查理泰萊(Charlie Taylor)取代捷維爾。因為係林伯特執教下嘅車路士一直努力向「年輕化」目標邁進,而且招攬更多優秀英格蘭「新仔」可以培養佢地成為未來國家隊主力,所以難怪年僅23歲就踢左接近100場英超嘅捷維爾會成為車路士想重金羅致嘅目標。
資料來源: https://www.thesun.co.uk/sport/football/11089024/chelsea-transfer-leicester-ben-chilwell-charlie-taylor/

自從係16/17球季正式幫球隊征戰英超以嚟,捷維爾就用穩定表現,說服唔同教練都將佢當成後防主力。今季目前佢已經收穫左兩個入球同三個助攻。

捷維爾跑得快之餘,佢好擅長判斷應該加速嘅最佳時機,例如睇準隊友「拉邊」進攻,對手又未留神嘅時候,先加速擺脫對手再交出長傳。影片2:01開始果球助攻就係例子。影片3:29開始,捷維爾就算停球4米遠,佢都有能力加速搶番個波,其後嘅控球都令人睇到佢嘅身體素質。
影片來源: https://youtu.be/RafwTrka4L4

捷維爾仲擅長一對一防守,站位意識唔錯,就算有空檔都可以用身體對抗能力同跑動能力去彌補不足。今季目前為止,佢場均有1.57次鏟球,1.09次攔截同埋2.04次解圍。至於利物浦左閘羅拔臣(Robertson),場均有1.68次鏟球,1.14次攔截同埋1.64次解圍,可以側面反映捷維爾同羅拔臣防守風格類似,而且有能力成為豪門嘅頂尖球員。
資料來源: https://www.premierleague.com/players/13491/Ben-Chilwell/stats?co=1&se=274

捷維爾注重站位、高度自律嘅防守絕對可以穩固車路士嘅後防,同埋可以為邊路進攻提供更多力量,豐富球隊嘅進攻方法。相比起而家車路士嘅後防球員,佢嘅自信心更加高同埋英超經驗更加豐富,可以提升隊友嘅士氣。

圖片來源: https://images2.minutemediacdn.com/image/upload/c_fill,w_912,h_516,f_auto,q_auto,g_auto/shape/cover/sport/fc-porto-v-portimonense-sc-liga-nos-5e5bcc7712eb9aa04c000001.jpg

波圖左後衛泰利斯(Alex Telles)加盟左球隊已經4季,5年長約就快到期。目前為止佢已經參加超過115場葡超,有16個入球同35次助攻。即使數據亮麗可能係因為葡超強度比英超低,但作為葡超目前身價最高嘅球員(身價領先第2位200萬歐元),佢依然係球隊不可或缺嘅主力。係2014-15球季佢就幫土耳其班霸加拉塔沙雷奪得土超冠軍,仲有土耳其盃同土耳其超級盃,去到2017-18球季就幫波圖奪得葡超冠軍同埋葡萄牙超級盃。

由片段可以睇到,佢除咗有回防速度(而家車路士好需要嘅要素),填補防守空檔嘅預判能力,仲可以交出唔少靚罰球助攻。佢嘅準球準繩度高,可以比韋利安(Willian)交出更到位嘅橫傳。佢可以突然變速擺脫對手,客串翼鋒嘅角色,加上射門力度十足,令佢可以係禁區外遠射破網。今季目前場均1.3次射門,就證明佢有進攻嘅慾望同能力。
影片來源: https://www.youtube.com/watch?v=fOQUe8G66-4

其中一個亮點係影片2:45開始,己隊中堅失位,有好大空檔比對手長驅直入,但泰利斯好鎮定,睇準對手準備傳波果一剎那加速鏟波,仲即刻起身攞番個波,唔使犯規都可以瓦解到危險攻勢。

有人覺得捷維爾身價過高,車路士買佢唔抵。根據轉會市場網站嘅數據,捷維爾目前嘅身價係5000萬歐元,而泰利斯嘅身價係4000萬歐元。兩人嘅身價都升得好快,只係捷維爾升得仲快(用兩時間升左16倍),而且年紀輕輕就成為「全球第3貴左後衛」,難免會令人覺得身價過高。

筆者覺得捷維爾有嘅係潛力同埋紀律性高嘅防守,可以迫對手少用邊路傳中,盡量減少車路士承受高空轟炸嘅風險。當然佢仲需要至少兩三年時間,先至可以成長到羅拔臣嘅高度。至於泰利斯,佢勝在進攻能力同防守能力差唔多突出,可以當左中場甚至左前鋒用。如果韋利安真係不幸要離隊,佢係填補位置嘅最佳人選。佢出眾嘅防守意識亦有望提點一眾後防新仔做好補防工作,減少出現因為無人看管而不斷失球嘅慘況。不過泰利斯嘅攔截能力未必比捷維爾強,而且初嚟英超會唔會水土不服,可唔可以適應身體對抗強度仍係未知之數。

總而言之,如果車路士決定買捷維爾,咁買嘅係「未來」,將佢當作年輕化大計嘅關鍵人物,加上可以同唔少國家隊新星做隊友,默契會更好。如果車路士決定買泰利斯,咁買嘅就係「經驗」,贏過唔少獎杯,防守方面穩妥可以比到隊友充足信心,進攻方面夠多樣化可以提升全隊嘅進攻慾望同士氣。所以,車迷就算知道球會冇買佢地最想要果位球員,都唔使咁失望,因為兩位都各有所長,風格又可以融入同強化現存體系,對球隊實力提升絕對有實質幫助。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→