經典比賽回顧:台灣完場前連入兩球,主場擊退巴林創造歷史

Chris的角球生物 於 29/03/2020 發表 收藏文章
原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/

係好多人眼中,經典比賽可能係五大聯賽嘅豪門對決,歐國盃或者世界盃嘅重頭戲,升班馬奪得聯賽冠軍嘅終極之戰......不過筆者覺得比賽係咪經典,唔只係睇競技水平,更重要係臨場發揮、戰術運用,同埋最重要嘅體育精神。一場比賽,可能就令唔知名嘅球隊,命運從此得到改寫......今次就講下筆者好鍾意嘅台灣,講下佢哋一場足以名留青史嘅大賽。
圖片來源:https://s2.buzzhand.net/uploads/07/f/1016091/15079541714817.jpg
雙十節台灣主場2比1氣走巴林嘅新聞報導,下文有更詳盡嘅影片
影片來源:https://www.youtube.com/watch?v=YGcTEtr4XJE

講一場比賽點解經典,點都要講下球隊嘅背景,先至更容易明白到點解贏一場波可以咁振奮人心。自從上世紀70年代起,港人冇得再代表中華民國出賽,台灣隊嘅成績就一落千丈。因為台灣當時仍處於戒嚴狀態,足球自然難以發展,更何況係培養睇波嘅風氣。比起男子足球,台灣嘅女子足球更早打響名堂,曾經晉級第一屆世界盃,不過今日都係先講男子足球。台灣一直都冇自己嘅職業聯賽,唔知點樣建立職業聯賽,同埋以前太依賴香港人,變相缺乏培養本土人才,所以長期被視為「亞洲魚腩」。其中一項奇特現象,就係客場觀賽人數仲多過主場。

2011年,台灣足球開始迎來改變。對於缺乏足球基建,足球文化嘅地區,引入有外國血統嘅強援係好好嘅宣傳手法,亦可以即時提升些許戰力。比甲嘅中法混血兒陳昌源選擇為台灣效力,令同年7月3日嘅世界盃外圍賽,觀眾人數高達15,000。陳昌源主射十二碼破網,幫台灣反勝馬來西亞3比2。可惜足協唔擅長同歸化球員溝通,連出場費、機票費用都可以不斷引起爭拗,令部份歸化球員退隊,世界排名更一度跌到歷史新低第191位。
陳昌源踢過接近200場比甲,為台灣踢過9場入4球
圖片來源:https://img.ltn.com.tw/Upload/sports/page/800/2017/10/10/phpbCqm5T.jpg

因為亞洲足協係世界盃外圍賽方面嘅改制,小組循環賽嘅出現令世界排名好後嘅國家都可以踢多幾場比賽。只要闖入第二輪,就唔使好似以前咁,踢兩場就會出局。台灣主場連汶萊都贏唔到,不過客場反勝,事隔九年終於晉級第二輪外圍賽。一隊連出場費都冇保障,缺乏大賽經驗,同埋冇專人負責場外事務,要球員分心處理嘅球隊,可以對佢地有幾大期望,贏波會係幾唔正常嘅事?足協換左一批人手之後,國家隊嘅宣傳開始多元化,吸引到一批年青球迷開始組織Ultras打氣團。
台灣晉級2018年世界盃外圍賽嘅辛酸同感動歷程
影片來源:https://www.youtube.com/watch?v=7cxakC7LaO4&t=353s

2019年亞洲杯外圍賽,台灣同巴林、土庫曼、新加坡同組,無論睇世界排名,或者睇大賽經驗,作客距離,台灣人自己都唔睇好台灣隊。Gary White同外籍教練團嘅到來為台灣帶來進一步嘅改變,將英式踢法傳授比台灣球員,鍛鍊佢哋嘅體能,為日後嘅成功鋪墊基礎。當然,有更多本土球員外流都好重要,例如香港球迷最熟悉嘅陳柏良。佢喺2011年先效力天水圍飛馬,之後效力中甲同中超隊,喺浙江綠城更加擔任過隊長,5年間為佢地踢左131場比賽。佢有個紀錄就係台灣史上最年輕嘅隊長,睇埋佢嘅外流經歷,係名副其實嘅台灣隊長。台灣仲有兩位原住民球員比較出名,分別係效力中甲嘅中場溫智豪,同埋由中甲轉戰港超嘅前鋒陳浩瑋。
最左係左後衛殷亞吉,右邊三位係陳柏良、溫智豪同陳浩瑋
圖片來源:https://img.appledaily.com.tw/images/ReNews/20170303/640_50e2323ae015bb475961436746947fdd.jpg
陳柏良係首位台灣出生嘅中超球員,為台灣出賽79場入25球
圖片來源:http://www.jinbaosports.com/uploadfile/2019/0212/20190212124035743.png
陳浩瑋(左)同溫智豪(右)曾經效力同一支中甲球隊
圖片來源:https://cdn2.ettoday.net/images/2254/2254744.jpg

2019年10月10日雙十節,台灣係主場迎戰中東勁旅巴林,如果呢場比賽再輸,台灣好可能就提前宣布晉級亞洲盃失敗。一個月之前,台灣作客巴林大敗5比0,不過總教Gary White依然向球員表明,唔好放棄贏嘅希望,要係雙十節踢場好波回饋球迷。

簡略講下巴林足球同國家隊有幾勁,佢地係1911年就開始有英國傳入嚟嘅現代足球。佢哋喺2004年亞洲杯獲得殿軍,同年成為世界排名升得最多嘅球隊,係2006年同2010年都差一步就可以踢世界盃(排第五名所以獲得附加賽資格)。雖然近年表現有所下滑,但已經連續五屆晉級亞洲杯嘅巴林,理論上依然比缺乏職業聯賽嘅台灣強得多。
巴林有豐富嘅大賽經驗,2019年仲首次贏得海灣盃同西亞足球錦標賽嘅冠軍
圖片來源:https://as01.epimg.net/en/imagenes/2019/12/08/football/1575817529_124447_1575829912_noticia_normal.jpg

賽前Gary White仔細蒐集巴林嘅情報,知道佢地鍾意係邊路進攻,再靠個人能力突破,所以台灣嘅團隊防守變得非常重要。為左唔好比巴林一面倒進攻,台灣都要反擊,所以Gary White排出4-3-3嘅陣容。右後衛派上混血兒陳昌源出戰,穩定軍心之餘,防守意識一流,長傳可以策動反擊。中前場有溫智豪、陳浩瑋、陳柏源等絕對主力,更有土耳其裔歸化兵朱恩樂歸隊,進攻能力有保證。

因為巴林上場大勝5比0,全隊波連埋教練,自然會將台灣視為魚腩,戰術幾乎冇改變,所以今場就比台灣睇穿。由守門員嘅出波模式,去到中前場嘅傳波模式,台灣隊都有徹徹底底嘅改變,所以今場贏波唔只係奇蹟,更加係靠實力同戰術取勝!
圖片來源:https://bit.ly/2xBmVvS

溫智豪同拍檔陳毅維踢防守中場,迫到巴林靠邊路同長傳進攻,而且教練要求動態攻防,防守時用4-2-3-1,進攻時立即轉用4-3-3,令巴林好難再將攻勢滲透入禁區。台灣亦比以前踢得聰明,間中製造反越位陷阱,令巴林係頭15分鐘竟然得1腳射門。

第19分鐘,巴林獲得具爭議性嘅十二碼,領先一球後就想係後場傳波浪費時間。雖然係好唔甘心,但台灣都要先繼續做好防守,先有反勝嘅本錢。因為台灣後衛有經驗豐富嘅歸化兵,預判走位好準,迫到巴林前鋒要退到中場先接應到波,橫傳少左,射門都自然少左。
陳昌源能守能攻,即使左腳有鋼釘,佢依然忍痛比賽,精神可嘉
圖片來源:https://bit.ly/3atlDSi (轉自中華民國足球協會CTFA Facebook專頁)

下半場初段,巴林有連番攻門機會,不過全部都浪費晒。佢地來台之後訓練量不足,體力下滑後就被台灣不斷反攻,要靠犯規阻止攻勢。第70分鐘後,台灣進一步壓前,令巴林龜縮半場,有波就向後場傳。

第89分鐘,台灣守門員開波策動反擊,好戲開始上演。守門員潘文傑近傳比後衛殷亞吉,之後傳比右後衛陳昌源。佢睇準時機,直接比長傳入小禁區,陳柏良射門扳平比分。入球之前台灣有連續6次傳波成功,係近3年嚟第一次,當然更加重要嘅係,呢球鼓舞咗成隊波嘅士氣,全隊球員同全場球迷都想再下一城。
由落後0比1到連入兩球反勝嘅完整片段,睇到全場球迷都好激動
影片來源:https://youtu.be/tRTCLoKfenU

重新開波之後,守門員潘文傑擋左幾次有威脅嘅攻門,出色嘅表現令佢之後比港超球隊睇中。補時第93分鐘,翼鋒陳浩瑋係左前場傳中,土耳其裔歸化兵朱恩樂跳高頂頭槌破網,比分變成2比1!巴林之前一直想消耗時間,而家自食其果,最後佢地就迎來呢場「國恥」級數嘅敗筆,台灣就迎來國慶日最亢奮嘅逆轉勝。
潘文傑做出幾次關鍵撲救,係贏波功臣之一
圖片來源:https://bit.ly/3dMY1KG (轉自中華民國足球協會CTFA Facebook專頁)
賽後台灣職球員大合照,慶祝難能可貴嘅勝利
圖片來源:https://bit.ly/2UJ2NA6 (轉自中華民國足球協會CTFA Facebook專頁)

呢場波,絕對值得載入台灣足球嘅史冊。當年加拿大未有職業聯賽都可以踢入世界盃,台灣都差少少就可以入到亞洲盃。未來可期,唔應該得個講字,所以希望台灣球員繼續爭氣之餘,足協都要實事求是,呢一兩年內認真成立職業聯賽,唔好過份依賴入籍球員,提供更完善嘅球員保障同訓練設施,令台灣可以透過足球係國際舞台發揮影響力。台灣魂,Taiwan!
而家台灣足協多左充滿活力嘅宣傳,希望聯賽同國家隊繼續向正確方向發展
圖片來源:https://bit.ly/3aDA7iR (轉自中華民國足球協會CTFA Facebook專頁)

想睇多啲深度分析文章,記得訂閱我嘅專欄,多謝支持!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→