《加超聯簡介:只有8隊,未有降班制,可為2026年世界盃鋪路?》

Chris的角球生物 於 10/03/2020 發表 收藏文章
原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/

相信大部份人聽到加拿大足球,都會首先諗到美職聯3支加拿大球隊(FC多倫多、蒙特利爾衝擊、溫哥華白浪),或者係目前全國身價最高嘅19歲拜仁新星阿方索·戴維斯(Alphonso Davies)(遲d會寫文章講下佢嘅潛力)。大家又知唔知三年前,加拿大終於重新有番自己嘅職業聯賽?受寒冷氣候影響,好多加拿大足球員以前只可以踢室內足球。1986年加拿大首次躋身世界盃決賽周嘅奇蹟,促使1987年出現首個職業聯賽。因為球隊狀況唔穩定,觀眾人數不斷下跌,經費不足,係1992年聯賽只剩6隊嘅情況下正式結束。

雖然有二十幾年「缺乏職業聯賽」嘅空白期,但國家隊偶然都有成就,例如係2000年爆冷奪得美洲金盃,係2002年同2007年都能夠晉身4強賽。

係2013年6月,有人提出組建全新加拿大職業聯賽嘅想法。加式足球聯盟嘅球隊Hamilton Tiger-Cats班主Bob Young做投資人代表,同時任足協會長Victor Montagliani合作發展職業聯盟。Tiger-Cats集團被足協賦予特權,成立主場位於哈密爾頓嘅新足球隊。係2016年,Bob Young向哈密爾頓市議會爭取升級主場設施,幫助球隊係冬季期間都可以接受專業訓練,可見Bob Young係推動加拿大職業足球復甦嘅重要人物之一。2017年5月6日,足協正式批准新聯賽嘅成立。2018年4月27日,聯賽嘅標誌正式亮相,融合左加拿大多元文化同北極光嘅要素。係國慶日或者大賽期間,標誌會轉為紅色。

圖片來源:https://www.pngitem.com/pimgs/m/593-5938056_cpl-logo-full-fte-de-la-musique-hd.png

揭幕賽隆重其事,可見球隊同球迷對新聯賽嘅重視

影片來源:https://www.youtube.com/watch?v=NbZX7Yew1y4

2019年4月27日,首屆加超聯正式揭幕,賽期直到10月19日結束。參考拉丁美洲足球聯賽,首季聯賽分為春季聯賽同秋季聯賽兩部份,兩季冠軍會晉級到加超聯總決賽。今年開始,因為有第8支球會加入,聯賽唔再分為兩部份,賽期同樣係4月至10月。每隊參加14場主場比賽同14場客場比賽,賽程編排會盡量縮短作客球隊係交通方面花費嘅時間。賽季第一名會直接晉身總決賽,第二同第三名會踢附加賽。
加超聯創始球會分佈圖

圖片來源:https://canplfc.files.wordpress.com/2018/08/map-png.png

加超聯球隊同時會參加盃賽,同美職聯嘅加拿大球隊、第3級別聯賽冠軍,互相爭奪「中北美洲及加勒比海冠軍聯賽」(CONCACAF Champions League)嘅加拿大席位。

首屆加超聯,主席係Bob Young嘅哈密爾頓鍛鋼足球俱樂部(Forge FC)嘅整體成績排賽季第二,不過係季後賽成功奪冠,亦晉級至「中北美洲及加勒比海聯賽」(CONCACAF League)十六強。呢支球隊亦係撐起加超聯球市嘅功臣,每場平均有超過6500名觀眾,比起聯賽平均觀眾數字嘅4279高唔少。

圖片來源:https://northerntribune.ca/wp-content/uploads/2019/11/forge-fc-champions.jpg

Forge FC作客絕殺Cavalry FC奪冠影片

影片來源:https://www.youtube.com/watch?v=RNy4VeeQr7E

為咗保障本土球員嘅發展,每支球隊最多可以擁有7名外籍球員,而且最多只有5位外援可以進入正選陣容。目前最高身價嘅球隊係約克九鎮足球俱樂部(York9 FC),達303萬歐元,亦係擁有最多外援嘅球隊。

參考最新一期嘅加拿大國家隊名單,26人入面目前只有兩人係加超聯球員。加超聯官網亦有文章介紹有咩聯賽球員係有國家隊履歷,真心好少,不過期望聯賽發展成熟後會有更多球員入選。

資料來源:https://canpl.ca/article/club-and-country-cpl-players-who-have-reached-senior-canadian-national-team

首季加超聯神射手同助攻王都係由同一位加拿大球員包辦獎項,佢就係Tristan Borges。現年21歲,效力過FC多倫多同海倫芬嘅青年隊,2019年間效力Forge FC幫球隊晉級總決賽,成為加超聯年度最佳球員。今年轉戰比乙,加盟奧特海維利(OH Leuven),成為係加超聯鍛鍊後外流嘅本土年青球員。筆者希望佢將來可以為國家隊作出重要貢獻,為加超聯爭光!
Tristan Borges自我介紹影片

影片來源:https://www.youtube.com/watch?v=3jXqvMuSMoc

筆者之前都估唔到加拿大嘅職業足球發展史竟然咁短,球隊數目甚至少過港超聯。見到加拿大都開始下定決心發展足球,替佢哋開心之餘,慨嘆香港足球可以做多好多野。香港唔缺大財團,亦有唔少具備潛力嘅本土球員同外援,唯有缺乏發展方向同決心。政府係有計劃,但有幾多措施係真正實行到?球會同球迷嘅訴求又係咪聽到?稅務優惠、興建專屬訓練場、改建球場、開放本地足球賭博合法化......呢啲建議講咗好多年,但政府有試過認真考慮嗎?連加拿大都可以下定決心,點解職業足球歷史悠久嘅香港就唔可以下定決心,改革圖強?

筆者遲d會寫文章介紹多d加超聯球隊同加拿大國家隊,等多啲人了解加拿大足球嘅發展現況。有興趣嘅球迷記得訂閱我嘅專欄,同埋可以分享文章,讚好Facebook專頁,因為每篇文章都好花時間同好比心機去寫。多謝大家支持!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 球場會計佬
    球場會計佬 於 10/03/2020 評論 NO. 1

    OH Leuven同李斯特城同屬泰國 King Power Group, 李城近年都有外借球員去 OHL 吸取經驗,甚至用 OHL 去簽人,可以參考一下呢篇文章: https://s.fanpiece.com/pQOmxRB

    另外,2020 年加超增至八隊,新果隊係馬體會屬下全新成立嘅附屬球隊 Atletico Ottawa.

快捷鍵:←
快捷鍵:→