英超：阿仙奴走甩咗3張紅牌同十二碼 精選

當阿仙奴以「零紅牌、零失十二碼」姿態完成一個冠軍球季，表面上睇，呢隊波除咗踢得成熟，仲好似紀律同防守都完美無瑕。

但最新消息卻揭示咗另一個完全唔同嘅版本：阿仙奴唔係完全冇犯錯，而係有幾次明顯處理，本來應該要食紅牌或者輸十二碼，最後都避得過。

根據英超關鍵判決小組 key match incidents (KMI) 的資料，阿仙奴其實應該食 3 張紅牌，同時應該輸 3 個十二碼，只不過最後全部走甩晒。


咁即係咩意思？意思就係，阿仙奴球迷一路拎嚟自豪嗰啲「紀律數據」，原來未必係純實力堆返嚟，而係有一部分，係靠球證同 VAR 幫手保住。

你可以話 harsh，你都可以話唔公平，但呢個唔係網民鳩噏，係根據官方數據整理出嚟嘅結論。
最搞笑係，平時一講到爭議判決，總有人跳出嚟話「強隊自然會受針對」、「一兩球好閒」。

但而家唔係一球半球咁簡單，而係 3 張紅牌、3 個十二碼，全部都係足以直接扭轉比賽走向、改變積分榜形勢嘅超重大判決。


紅牌可以即時打爛一隊波嘅部署，十二碼可以一腳改寫賽果，呢啲唔係啲無關痛癢嘅界外球或者角球誤判。

當阿仙奴喺呢類最重磅判決上面可以一單接一單咁避過，你個冠軍仲邊有說服力？


我哋成日用數據去歌頌一支球隊幾咁穩定、幾咁有冠軍相，但原來有啲數據本身，已經被判決環境塑造咗出嚟。

足球世界從來唔怕爭議，最怕係明明有 VAR，爭議反而仲愈積愈多。