車路士要買施曼尤？我哋唔需要

各位車迷，Merry Christmas！相信大家最近都收到風，話我哋車路士有意向般尼茅夫（Bournemouth）嘅當紅炸子雞施曼尤（Antoine Semenyo）埋手。聽到呢個消息，我第一個反應係：「吓？仲買？」

無錯，施曼尤今季喺英超嘅表現確實好搶鏡，今季已經入咗8球，上季更係入咗11球，絕對係有卡士嘅球員。聽講佢合約入面有個6500萬鎊嘅解約條款會喺1月1日生效，所以吸引咗曼城、利物浦同埋我哋嘅關注。

不過，好消息係（起碼我覺得係好消息），根據最新權威消息（David Ornstein 同 Sky Sports），車路士高層同體育總監已經決定「縮沙」，退出爭奪戰！ 據報球會只係循例問價（Enquiry），了解完個價錢同條款之後，就覺得無必要再跟進。
點解？原因好簡單——我哋條鋒線已經夠晒人，仲要係頂級嗰隻！

大家睇下我哋今季條翼鋒線，簡直係「幸福的煩惱」。左路方面，自從今個夏天我哋用4000萬鎊由奧脫福帶走加拿祖（Alejandro Garnacho），再加埋由多蒙特加盟嘅傑廷斯（Jamie Bynoe-Gittens），我哋喺邊路嘅突破能力已經係英超數一數二。

加拿祖：雖然佢係前曼聯球員，但黎到史丹福橋之後，佢嘅鬥心同突破真係無得彈。佢嗰種直接衝擊對手防線嘅踢法，正正係我哋以前缺少的。

傑廷斯：呢位英格蘭小將技術細膩，腳法秀麗，同加拿祖嘅風格剛好互補。佢喺德甲浸過幾年鹹水，返黎英超適應得好快，已經逐漸站穩陣腳。
除咗呢兩位，別忘記我哋仲有柏度尼圖（Pedro Neto），同埋被視為未來球王級嘅艾斯迪禾（Estêvão Willian）。講真，馬利斯卡（Enzo Maresca）教練依家最頭痕嘅應該係點樣分配出場時間，而唔係無人肯去突破。

施曼尤係好波，佢雙槍將、大隻、護球能力強，絕對適合英超節奏。如果要比6500萬鎊買多個左翼球員，我覺得完全無必要。呢筆錢，留返黎買個世界級中堅或者留黎續約主力唔好？

既然球會都已經表態話對現有陣容「充滿信心」，我哋做球迷嘅就無謂再FF施曼尤會著上藍色波衫啦。曼城或者利物浦想要就由得佢哋爭飽佢，我哋坐定定睇加拿祖同傑廷斯表演就得！

總之，施曼尤？好球員黎嘅，但我哋真係唔需要了。