賽後分析：般尼0－3車路士－傷兵復出、新星融入，逐步重回正軌的車仔 精選

英超第7輪：般尼0－3車路士
入球球員：26" 薛耶治, 63" 蘇馬, 70" 華拿.
今場真係好有睇定嚟食嘅感覺，雖然普列錫賽前熱身時受傷，但面對今季頹勢的般尼，對手冇好高壓嘅迫搶，球隊大部分時間控制戰局，輕取對手3球。
.
華拿同阿巴謙似乎亦開始建立默契，二人會交叉走位，其中阿巴謙今日把握著正選機會表現出色，多次主動現身背對對手控球，成功回傳給隊友及分邊，成為球隊進攻的第一點，亦成功交出一個助攻。
.
另外都講一講曼治，佢嘅戰術執行性從來都冇令球隊失望。而今日佢出任中場中，主要負責串連中前場同控制節奏，亦參與好多後場策動同防守工作。其實今次亦唔係佢第一次踢呢個位，上季復賽後4－0大勝愛華頓一仗，正正係佢為遷就巴克利，而出任後一格的中場中角色。而曼治嘅表現亦冇令大家失望，佢的確係車仔其中一個最全面嘅中場球員。佢有一定嘅防守能力，亦有好好嘅閱讀球賽能力，無論係控制比較節奏定係串連中場都交到功課。尤其是車仔中前場已有普列錫、華拿、阿巴謙、薛耶治、夏維斯，曼治必須盡快找到自己的定位，絕不能再時而出任攻中、時而串演翼鋒。而似乎要在球隊搶得正選，這個8號位中場中位置對他來說是最適合的。.
不得不提的，當然是薛耶治為球隊所產生的化學反應，他直接為車仔進攻帶來生氣。總是主動現身攞波策動攻勢，左右中路都總會出現他的身影。而除了招牌式的斬對角盲眼位，他的創造力和通透的傳球絕對令車仔進攻的更立體。第一次在英超正選上陣，一個入球一個助攻，以他的足球智慧，其實不單單他本人能馬上適應英超，更將會是協助其他新球員融入球隊戰術的關鍵人物。正如阿積士所說，薛耶治真的是一個球場魔術師。
.
最後，車仔已經連續四場賽事保持不失球，而文迪更是連續五場不失球。早前那些所謂防守不是如基柏或是基斯甸臣等個別球員問題的說法，似乎都已經不攻自破。由文迪把關，泰亞高施華和蘇馬拍擋中堅，儘管後者仍不時有驚險鏡頭，但這個中路防守組合，似乎真係馬上改善了車仔防守的問題。加上捷維爾亮眼的表現，車路士後防終於「齊腳」，亦給予車迷絕對的信心。.
另外補充一下中堅組合的位置。其實蘇馬一直以嚟都係右中堅，當年佢加盟車仔初期就係佢右中堅、泰利左中堅。在林柏特麾下，蘇馬多以左中堅出現，某程度上其實係就基斯甸臣同杜莫利。而施華就一直都係左中堅，所以奇怪的反而是今季早前數次蘇馬拍擋施華，二人的位置卻左右調轉。個人的猜測是，基於施華的年齡問題，他不會長期正選，而假如基斯甸臣或杜莫利頂替施華，要蘇馬輪流出任左右中堅或會導致後防大亂，所以才安於原本的設定。但隨著基斯甸臣表現強差人意，能勝任左中堅的魯迪加或會重新得到機會，蘇馬就可以更放心的出任右中堅了。
.
季初的時候，對林柏特的批評聲不斷，進攻雜亂無章、防守風聲鶴唳，或者都是事實。但更多球迷忽略了的，是當時球隊仍然傷兵滿營、是受武肺影響今個球季幾乎沒有季前備戰、是在疫情下頻密賽程。我不會說車仔現在沒有任何隱憂，只是，隨著傷兵復出，隨著新球員逐漸適應，可以肯定的是球隊的確一步一步的重返正軌。.
車仔贏波後7戰3勝3和1負得12分，排在聯賽榜第4，落後榜首少踢一場的愛華頓1分。球隊下場賽事為星期三深夜4點，歐聯分組賽主場迎戰雷恩。