Kepa在車路士還有未來嗎？

繼續講Kepa。
1. 必須強調，個人認為Kepa唔係廢，只係唔夠勁。你好少會見到佢犯不大錯累球隊失波，但更多嘅係佢好少做高難度撲救拯救球隊。.
2. 你話後防責任更大，當然啦，後防踢得好，龍門可以全場冇野做㖭。但林柏特都講過，自從泰利卡華奴後，球壇唔會再出現完美中堅組合。又，龍門同後防，其實唔係位置唔同就可以分開講。前文都提到，龍門係場上唯一一個睇清晒成個球場嘅球員，佢嘅閱讀球賽能力、指揮後防能力，以至虛無啲嘅、令球員對「身後有守護神」那種信心，都至關重要。
.
3. 講返對利物浦嘅5個失波，楣底急墜近門頂入樣樣齊，無可否認係入得靚，但係咪就救唔到呢？如果真係100％要失嘅波，個人真心覺得只有第3球韋拿度姆門前勁射。其他4球波，好似基達嘅遠射、費明奴嘅頭搥、張伯倫嘅近射，老實講施治生涯入面都救過無數次相近甚至難度更高嘅波，相信Leno, Alisson亦點都救到1, 2球。當然你可以話我要求高，但Kepa背負住8000萬身價，我諗冇人期望佢只係一個普通門將。.
4. 「點解個龍唔撲嘅？」呢樣應該係令到林8同一眾車迷最嬲嘅事。就講阿諾嘅罰球，24-25碼，放人牆企大細邊，對面射得真係好靚，彎過人牆急墜，但個龍係咪就打工仔完成責任呢失波係非戰之罪呢？好多人即刻post咗美斯上季對利物浦時嘅歐聯罰球，艾利臣點樣飛到盡都鞭長莫及（https://www.youtube.com/watch?v=-kG-CjHQEH8）。或者好多人唔介意球隊失世界波，只係，你扮工都好都試下撲呀嘛。
.
5. 喺賽事入面好深刻嘅一幕（https://www.youtube.com/watch?v=di6iF1X5Ij4），羅拔臣開出罰球，全隊車仔球員大叫Kepa，但Kepa並冇出迎，最後個波小禁區彈地後雲迪克近門起腳，而車仔一眾球員就只有轉會攤開手埋怨門將。呢球可以見到車仔球員對Kepa嘅不耐煩，亦正正係Kepa喺禁區覆蓋範圍極低嘅問題，好似得個龍門框係佢負責咁。門將鮮有主動出迎，其實亦係死球防守同高空波輸蝕嘅一大原因。.
6. 最後，講多一次，尋日場波，防守球員確係責無旁貸。3－0一球韋拿度姆禁區勁射長期都解唔到圍、4－2一球任由費明奴在兩個中堅之中無壓力攻門、5－3一球佐真奴被爆過而阿朗素走漏身後的張伯倫，真係好典型嘅車仔失球。只係有時候一個龍門就要為一班後衛執屎，亦係事實。而Kepa你話佢係咪真係好差？我又覺得唔係。只不過，佢真係唔係Top Class，亦配唔上佢8000萬身價。而既然車仔要展現野心重返爭標行列，門將位置要達致長治久安，我相信，Kepa唔會係車仔嘅答案。