賽後分析：利物浦5－3車路士

英超：利物浦5－3車仔，好簡單講幾句。
.
1. 相當悅目嘅對攻比賽，固然阿諾的罰球球證的判決嚴重有爭議，而車仔即使一度落後3球依然冇放棄，展現無窮鬥志，甚至差點追平，未能取得分數固然可惜，但球員打不死的精神絕對值得尊重。喜見普列錫克服傷患復出，他的侵略性始終是車仔隊中無人能及的。.
2. 好多人會話，利物浦球球世界波／門前勁射，Kepa救唔到係非戰之罪，我唔否認，利記入嘅5球波，一般二線門將都會輸。但Kepa係8000萬身價嘅龍門，係車仔委以重任嘅最後一度屏障，就算你話後防再暴露，全英超最低嘅撲救成功率又係咪合格呢？相信大家心目有數。
.
3. 更重要嘅係，羅列斯啱啱就示範咗一個好龍門對球隊嘅影響力：熱刺對李斯特城，1－0領先下李斯特城攻勢不斷，然後羅列斯接連作出2個神救，很快熱刺就憑反擊拉開比數。一個好門將與普通門將的分別，除了長期的穩定表現外，最決定性的因素就係救到其他人救唔到嘅波，好似羅列斯咁，一來一回，就係因為佢而令熱刺由1－1變成2－0。.
4. 但Kepa的問題，又豈是我三言兩語、或者單單舉出撲救率低就能總結？撇除去季聯賽盃換人事件不說，還有太多指出他訓練態度懶散的指控。訓練場的事、球員的態度我們都難以定論，但場上的表現是有目共睹的，龍門的責任從來不單單是撲救，還有指揮後防、出迎封阻、接高波，Kepa又是否真的對得上自己的身價，又是否真的可以成為車仔長期信賴的1號呢？
.
4. 無論如何，聯賽前四爭奪將鬥至最後一輪。車仔與曼聯同分，但得失球輸蝕，而李城則以一分落後。煞科戰，車仔對狼隊、曼聯對李斯特城，而車仔要穩奪來屆歐聯席位，必須保持不敗，對今夏大肆擴軍的車仔來說，該仗絕對不容有失。如果球隊能踢出今天的拼勁，個人而言仍是樂觀的。