車路士球會簡介&歷史 (1)

車路士足球會(Chelsea Football Club,綽號藍軍、車仔),係一間位於英國首都倫敦嘅英格蘭足球會,而家打緊英格蘭超級聯賽,係世界最具規模嘅球會之一。佢喺1905年成立,主場位於倫敦嘅西南面鄰近泰晤士河嘅史丹福橋球場(Stamford Bridge)。

雖然車路士成立咗超過一百年,但成績要到近十幾年至大有躍進,其中2004-05年度球季首奪英超聯賽冠軍,並以摩連奴帶領車路士以總分95分成績成為歷來英格蘭頂級聯賽中得分最高嘅冠軍。翌年球季亦成功衛冕,成為第11支成功蟬聯聯賽冠軍嘅球會,同埋繼曼聯之後唯一能夠衛冕英超冠軍嘅球會。歐洲賽事方面,車路士亦連續喺2003-04年度、2004-05年度同埋2006-07年度打入歐聯四強,去到2007-2008球季更打入歐聯決賽。

早年歲月(1905-1955)

車路士喺1905年3月14日成立,主場位於今日倫敦嘅市中心區。冇幾耐車路士1905年5月29號被選為英格蘭乙組聯賽球隊,並喺1905年9月1號正式展開球會成立以嚟首場聯賽比賽,對手係史托港。

隨後車路士從其他球隊請咗多名聯賽球員,並正式升上最高級別聯賽比賽。車路士曾經喺1915年打入足總盃決賽,但攞唔到冠軍。此後車路士戰績一直都只係麻麻,得唔到任何主要榮譽,直到1954-55年贏得英格蘭甲組聯賽冠軍──球隊史上首個重要冠軍獎杯。

步入低潮(1960-1989)

車路士隨後喺聯賽一直都攞唔到任何榮譽,但喺杯賽仍然有一定成績,先喺1965年取得球會史上首個聯賽盃冠軍,並喺1967年獲得足總盃亞軍。1970年車路士喺足總杯決賽以2-1擊敗列斯聯,並喺一年後贏到歐洲盃賽冠軍盃──球隊史上首個歐洲比賽冠軍。

但此後車路士一直得唔到更多榮譽,主要係由於球隊紀律退化,以及重建主場引起嘅球隊財政問題,導致大量球星被賣走、球隊降班,連主場都賣埋畀地產發展商。七八十年代嘅車路士一直只係喺甲乙組浮浮沉沉,並曾經降過兩次班。

重回正軌(90年代)

1989-90年車路士正式重返甲組,並喺同年以黑馬身分取得聯賽第四名。幾年後車路士請咗當時35歲嘅前英格蘭中場球星格連荷杜做領隊。荷杜領軍第一年就帶領車路士贏得足總盃亞軍,取得歐洲聯賽冠軍盃嘅參賽資格,重返歐洲賽場。九十年代中期班主卑斯(Ken Bates)正式入主車路士,喺佢支持下使咗平均幾百萬鎊收購名將,其中最出名嘅係喺1995年收購荷蘭名將古列治同埋前曼聯射手馬克曉士。荷杜1995-96年球季帶領車路士取得聯賽第11名嘅差劣成績之後就辭職,轉教英格蘭國家隊。

古列治喺1996-97年球季成為球會領隊,第一個球季就帶領球隊打入聯賽頭六名;而足總盃決賽以2-0擊敗米杜士堡更為車路士取得26年來首個大賽錦標。1998年2月古列治宣佈辭去車路士領隊職務,由球隊嘅意大利籍射手維埃里(Gianluca Vialli)接手。維埃里一上任就為車路士取得1998年歐洲盃賽冠軍盃同埋聯賽盃,1998-99年亦帶領車路士取得聯賽第三名,並首次進軍歐聯;1999-2000年球季打入歐聯8強;2000年衞冕冠軍曼聯宣佈唔參加足總盃,喺天時地利配合下車路士取得足總盃冠軍。當時嘅車路士引入咗好多外來球員,範圍包括意大利、荷蘭、法國、德國以至西班牙,例如意大利射手蘇拿、荷蘭守門員迪高爾(Ed de Goey)、法國中場拿保夫(Frank Leboeuf),以至西班牙右後衞費利亞(Albert Ferrer),因隊中擁有多國球員而俾人稱為「聯合國部隊」。

光輝歲月(千禧年代)

2000-01年球季車路士遭逢一系列敗績,全季勝出賽事只喺主場攞到,成為「作客蟲」。結果維埃里喺2000年9月俾車路士炒咗,由意大利籍教練雲尼亞里(Claudio Ranieri)做領隊,雖然換入一啲新面孔充實球隊,但雲尼亞里偏柔嘅個性並未為車路士取得任何錦標,反而因為使咗太多資金喺球員買賣,結果令車路士負債7千7百萬英鎊。資金缺乏令車路士無法進一步增強實力,加上戰績一直麻麻,球隊大有重蹈七十年代覆轍嘅可能。

卑斯喺2003年6月以6千萬磅將球會賣畀俄羅斯億萬富翁阿巴莫域治。佢幫球會還晒7千7百萬英鎊債項,車路士財政匱乏嘅局面至得以扭轉。阿巴莫域治投入大量資本,用咗成億嘅資金羅致馬基利尼、基斯普、祖高爾同埋杜夫等多名球星。一個球季之後,車路士喺英超聯賽攞到亞軍,兼打入歐聯四強。隨後,球隊炒咗冇乜建樹嘅雲尼亞里,重金請咗啱啱帶領波圖贏得歐聯嘅葡萄牙主教練摩連奴,又從英超球隊曼聯請到簡朗做行政總裁;而喺球員方面,車路士繼續引入高質素球員,包括科特迪瓦射手杜奧巴、荷蘭新秀翼鋒洛賓、捷克門將施治等等。

摩連奴入主標誌著車路士正式起飛嘅輝煌時代。喺佢入主嘅第一個球季,便帶領一眾主力奪得2004-05英超聯賽冠軍,唔單止打破咗當時曼聯喺英超嘅壟斷地位,重為球隊取得自1954-55年球季以嚟首個英格蘭頂級聯賽冠軍。更值得一提嘅係,車路士喺嗰季創下一系列紀錄:英超聯賽有史以嚟嬴最多場(29場)、最少失球(15球)同埋最高分嘅球隊(95分)。佢哋重攞到聯賽杯冠軍,並喺歐聯打入四強,但輸咗畀利物浦。

2005-06年車路士前段喺英超聯積分榜已經遠遠拋離其他對手,即使得分差距最小嘅曼聯仍少車路士十三分,其他嘅至少差成廿幾分。2006年4月29號車路士主場以3:0大破曼聯,成功衛冕聯賽冠軍。但喺歐聯,車路士兩回合以2-3輸畀巴塞隆拿,16強止步。

2006-2007年球季,車路士雖然只能夠取得聯賽亞軍而未能再次衛冕聯賽冠軍,但就喺三年內第二次贏得聯賽杯冠軍,並喺足總杯決賽以1-0擊敗曼聯贏得足總杯冠軍,係新溫布萊球場落成後第一個喺嗰個球場捧走足總杯嘅球隊,咁啱車路士亦係舊溫布萊球場重建前最後一支奪得足總杯嘅球隊。

2007-08賽季首場賽事,車路士喺主場以3-2擊敗伯明翰以連續64場主場不敗戰績成為英格蘭足球史上最長主場不敗球隊,正式打破利物浦喺1978-1980年創下嘅63場「最長主場不敗紀錄」,至今仍然不斷創造同埋延長呢個紀錄。2007年9月20號領隊摩連奴突然離開球會,宣佈同球會解約,而以色列人格蘭(Avraham Grant)就上任做新領隊[1]。不過車路士喺2007-08年球季一個錦標都攞唔到,英格蘭足總盃八強出局、英格蘭聯賽盃決賽輸咗畀熱刺、聯賽以兩分之差屈居曼聯之後得第二、歐聯首次打入決賽,但喺互射十二碼階段輸畀曼聯,做咗「三料亞軍」。而格蘭就喺2008年5月24號,球季完咗幾日之後俾人炒魷。

2008年7月,車路士揾咗史高拉利(Luiz Felipe Scolari)做新領隊,不過佢只係做咗7個月,喺2009年2月因為球隊成績差而俾人炒魷,由俄羅斯國家足球隊領隊希丁克兼任看守領隊到季尾。而希丁克亦帶領球隊贏得英格蘭足總盃冠軍。

2009年中,車路士揾咗安察洛堤做新領隊。佢帶領車路士攞到2009-10英超聯賽冠軍及衛冕英格蘭足總盃冠軍,令球隊首次贏得雙料冠軍,同時創下英超聯一季射入103球紀錄

link : 維基百科 http://zh-yue.wikipedia.org/wiki/%E8%BB%8A%E8%B7%AF%E5%A3%AB
標籤: CHELSEA  chelsea  terry  torres  lampard  carlo  Fc Chelsea  車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→