淺論歐聯決賽表現

尋日寫返文，雖然筆者無法睇哂場波，都係今晨睇左精華，見到各界熱烈討論，筆者又講少少淺見。


其實尋日利物浦表現絕不失禮，眾所周知其實利物浦陣容既成熟度同完整度係未夠，打法上容易被針對克制，不過將士用命﹑鬥心又強，今季表現算唔錯，日後進步下其實回歸列強不難，今季打入歐聯決賽已超額完成。當然，如果你話真係要同皇家馬德里決一勝負，其實以利物浦嘅陣容依然仲係難以匹敵，因為皇馬嘅陣容比較完整，熟練度都係比較高，加上喺歐聯皇馬往往特別醒神。當然，你話如果沙拿(Salah)冇傷到，有冇得打呢？咁又真係好難講，但係有佢嘅話，利物浦反擊嘅威脅一定更大。而沙治奧拉莫斯(Sergio Ramos)嘅行為，其實我見到有唔少皇馬fans都有聲討呢個行為，有人講話贏咗都唔光彩，當時半場都未到。但誰是誰非，筆者唔係沙拿本人，又唔係水哥本人，啲人話係拉莫斯夾手，佢又話沙拿拉佢在先，筆者只能話，佢本身防守打法比較硬，沙拿踢法上動作不大，所以事情變成咁，筆者唔係聊交嗌，所以呢度完啦。

至於講到龍門，筆者覺得佢係衰緊張。其實卡利奧斯(Karius)依然算係後生，尤其是做門將。我都講過利物浦打入決賽係超額完成，其實以卡利奧斯嘅資歷同能力，暫時未夠班打咁高水準嘅賽事，緊張係好正常，佢都係今季開始表現有所進步，打返啲好波，突然之間打打下入咗歐聯決賽，仲要對住皇馬，緊張真係正常不過。

講返失球，你話第一球賓斯馬有冇犯規，我覺得又唔算阻住人開波，因為佢已經開咗個波，你可以話佢呢個決定太求其、心急，但係筆者就覺得賓斯馬(Benzema)只可以話係反應快，因為卡利奧斯已完成開波嘅動作。第二球係世界波就冇得好講，不過睇精華見到卡利奧斯似乎以為係會出界，所以有少少縮手嘅動作，你可以話輸判斷嘅經驗，因為正常應該照撲，確保佢會出界。第三球就更加明顯係緊張，歐聯決賽去到尾段，輸緊一球，作為龍門一定有壓力，不過佢處理得唔好。

至於皇馬其實只係發揮佢哋一般係歐聯嘅水準，不過因為陣容嘅成熟度高過利物浦，贏其實係值得野嘅，就算卡利奧斯無乜犯錯，我相信最後都有機會係皇馬贏。只不過呢場咁樣輸法，加上沙拿受傷嘅時候被knock down咁，好多人對於利物浦會感到唔抵或者可惜，尤其皇馬已經贏咗兩屆歐聯，大家都想見下啲新面孔捧起冠軍，加上利物浦沉寂左好耐，突然係歐聯打出醒神嘅表現，唔少球迷心底裏都有啲打氣聲。

咁筆者都希望來季利物浦可以進一步解決陣容上的不足，繼續作為傳統勁旅，進一步踏上復興之路，繼續有好表現既，筆者亦認同卡利奧斯既能力，如果有個老將指點，相信有更好既進步。不過作為車路士球迷，真心話梗係唔好對住車路士有咁好表現啦～

多謝各位不吝賜評，一like一支持，多承指教：
https://www.facebook.com/chelsea.gor.sk