哥斯達離隊，淺論車路士的鋒線

經過長久既擾攘，迪亞高哥斯達(Diego Costa)之亂暫告一段落，哥斯達將以6000萬歐元左右既價錢，回歸馬德里體育會。對呢件事，筆者覺得係開心既，無論對幾方面而言，都有佢既好處。


首先，因為哥斯達係紀律上既問題，同干地(Conte)既治軍方針唔夾，加上哥斯達改善後，係唔同場合既一啲表現都仲係有一定爭議性，加上場上偶有小動作，而令干地不大滿意，後黎更早早落實表示哥斯達唔係球隊今季既計劃之中。點知搞一大輪，哥斯達點都要返馬體，馬體又因為禁令問題遲遲無買，塞左成個轉會窗。而車路士高層可能因為財政原因，想賣到佢有足夠資金先落實，令球隊收購工作都有影響。


幸好，現時終於成功賣走，哥斯達同車路士雙方都不必再操心，都可以準備迎接新一頁，前者可以疊埋心水返馬體踢返出好波，後者都可以騰出預算進一步強化球隊，鞏固干地組軍。筆者其實都覺得件事正面，始於拖左單野咁耐，搞得掂真心爽，對更衣室、干地、球迷都係好事，筆者就期待筆錢係季中睇下可唔可以再補充返板凳深度，不過季中買人唔易，季尾先dum返筆錢都無傷大雅，最好既係件事見到管理層信任領隊，係解決球員方面既問題，而非將矛頭反指領隊，對球隊既管理有好處得多。


而當然，對哥斯達終於如願，都係好事，佢咁都無得keep住狀態，對表現都有影響，而馬體鋒線近期表現都一般，如果哥斯達能夠發揮回巢舊將迅速融入既特點，應該可以幫馬體改善表現，同時都一吐烏氣。佢雖然有車路士鋒線所需要既騷擾能力同身位，同時又有足夠把握力，但可能佢帶黎既問題更困擾到車仔，幸而近期新兵莫拉達(Morata)交出不俗表現，今晚更上演帽子戲法，而艾斯派古達(Azpilicueta)既傳中同佢似乎有一定化學作用，可能莫拉達係干地麾下既車路士更適合既鋒線人選。雖然前車路士助教韋健士(Wilkins)表示哥斯達既野性同身位，比莫拉達適合車路士。但筆者不敢苟同，莫拉達或者身位無咁好，但身高有返咁上下，加上技術同靈活性可以以另類方式提供戰術作用，而且佢既鬥心絕唔差過哥斯達，佢都要證明皇馬出賓斯馬(Benzema)唔出佢係錯(well，so far好似莫拉達又應該好好多)。

不過點都好，筆者覺得哥斯達絕對係麻煩友，早走早著確係筆者睇法。但見到佢真係離開左球隊，都應該祝佢一帆風順(除左倒戈)，始於曾貢獻過唔少好波同英超冠軍，只不過大家唔岩者，我地都有左更好既，倒不如分手快樂算。

最後，筆者最想問既係，哥斯達都無操練一排，又離心極重，都尚且賣到6000萬歐元，何以艾基(Ake)、查路拜(Chalobah)、查奧爾(B.Traroe)又賣得咁平呢？！潛質小將，有啲仲英人呀大佬！= =
干地：X！我都想問！(設計對白)


多謝各位不吝賜評，一like一支持，多承指教：
https://www.facebook.com/chelsea.gor.sk