淺論車路士季前近況

車路士淺論 於 29/07/2017 發表 收藏文章
本來想講下組軍融入既題材,不過睇完車路士對國際米蘭既國際冠軍盃,真係不吐不快。筆者會分兩part講下對車路士季前呢段時間既近況既睇法,主要講轉會同戰術。


轉會方面恐怕都不必筆者多言,車路士既總監質素差劣應該係人盡皆知,轉會談判緩慢,有財力有名氣,但仍然無法吸引目標來投,問題正是出係負責轉會運作既總監身上。龐大外借軍團浪費唔少潛力新星既時間,但至少有助佢地成長,都有機會睇下有無上一隊既潛質,無既放走都可以係佢上位去其他高級球隊既契機。不過呢一兩季其實有唔少顯示出有能力入到一隊作兵源,而且位置都係球隊需要既。例如防中位置既查路拜(Chalobah)、左閘/中堅位置既艾基(Ake),雖然筆者好同意干地所言,就係現時既小將欠缺等待上位既耐性,而佢地亦應該係希望得到更多上陣機會自求離隊,不過點說服佢地係球隊有能力做好啲既地方。

咁都算,係放走一定後備兵源後,應收購合適人腳補強或補充戰力,不過現時車路士所簽球員顯然並不足夠。迪亞高哥斯達(Diego Costa)及馬迪(Matic)應會離隊,而確實佢地既位置都有需要提升。巴卡約高(Bakayoko)同莫拉達(Morata)既來投係合適補充,仲可能有所提升,但球隊轉打三後衛既打法後,翼衛位置既深度及前場提供變化既人腳都仲需要收購,但到而家已經開始集訓同打熱身賽,都仲未有影,其實唔合格。君不見AC米蘭收購功力之強,雖然係用錢撻人,但錢我相信肯俾既唔少球會都俾得出,問題係一隊正值復興而未有實質成績既球隊,都有能力做到,而應屆英超冠軍買唔到人就未免失色。


至於戰術,筆者其實並不太明白干地打既如意算盤。莫拉達以6500萬歐元來投,肯定係想加強中鋒質素,但近三仗都以巴舒亞伊(Batshuayi)出任正選中鋒,而除了對阿仙奴一戰及鬥心外,其實表現不算十分有說服力,而萬拉達自上仗對拜仁後可以上陣,但兩仗均出任左翼,雖然佢係控球、反搶都有一定功課交到,但始於佢初黎,將佢放係新位置踢新球隊,其實難以理解,中段仲要換佢都唔換亞伊,又唔係打3-5-2一類雙箭頭,並唔明干地對前場既安排係點。


另外,干地過份堅持3-4-3,而且亦太過堅持起用摩西斯(Moses),其實筆者有提升過摩西斯既問題,就係技術同防守技術都唔足以勝任強隊既翼衛,係英超佢充沛體能同飛快速度尚可補充不足,但來季唔少球隊都收購補強,加上車路士出戰歐聯,對陣歐洲強隊就唔夠做,比如呢兩仗對德甲強隊及意甲勁旅,就顯出問題,不過干地既不轉3-5-2、又唔換摩西斯,其實唔太明白佢希望考察到咩同練咩。


以筆者愚見,其實車路士應盡快簽入辛度(Alex Sandro)一類具速度等能力打到左翼衛既勁人,就算唔係都要嘗試球隊收起摩西斯既打法,佢明顯能力已見底,對車路士長遠並無足夠幫助。另外係熱身賽,車路士應該嘗試俾莫拉達出任中鋒,俾佢適應同考察佢有咩作用俾到出黎,要知車路士中鋒一向唔易打,要俾時間同微調戰術適應,另外巴卡約高、魯迪加(Rudiger)、基斯甸臣(Christensen)三人融入既程度都係考察重點。不過現時干地既考察似乎只局限係用3-4-3應付各支強隊,而強塞新兵入去舊戰術,過份堅持舊戰術同舊人選,上季季尾曾經出現過,令成績一度有不穩跡象,希望唔好重蹈覆轍,加快返收購進度,攞返上季大膽轉打三後衛既魄力,轉返適合佢地發揮既戰術同令球員有時間適應,否則車路士來季成績或者並唔會好得去邊。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: chelsea  

留言


請按此登錄後留言。未成為會員? 立即註冊
  • Marjill 於 29/07/2017 評論 NO. 1

    其實一隊強隊應該有二套戰術,但車仔而家只行駛一套343防反,而呢套戰術亦逐漸被其他球隊睇通曬。再唔變開季幾難打。

  • @michael@ 於 30/07/2017 評論 NO. 2

    如我之前所言,莫仔腳法算細膩,要他踢車中鋒可能會易傷或不習慣,干地可能先擺翼位等他了解隊友踢法,球隊戰術及行軍節奏及,屬過渡性質,如果而家傷左仲大鑊,季初包輸亞姨可能會惰後少少,比佢入契。

  • KenChan沙田友 於 30/07/2017 評論 NO. 3

    大家以為車仔引四援叫花$和實力補強,但實際呢?

    卡巴尼路替比高域丶魯迪加替泰利丶巴卡約高替馬迪丶莫拉達替哥斯達,真正車迷都知,車仔實力沒有顯注提高,而且季前傷了幾位!
    (別忘了年初Ivanovic, Oscar, Mikel三位曾經主力出走,雖然他們的實力早已無法在車仔打正選!)

快捷鍵:←
快捷鍵:→