估你唔到:淺論車路士對曼聯

車路士淺論 於 24/10/2016 發表 收藏文章
呢場賽果,相信曼聯球迷估唔到,車路士球迷都估唔到。本來筆者預計呢場波雖然計起黎,車路士應該比較係佔優既一方,如果無和既應該都贏一兩球度,一野入四球完全令筆者好意外。實際上,除左開季初期同今星期,曼聯其實表現不算好,並未有應有發揮,對利物浦一場既部署同對費倫巴治既大勝,本來以為會有返d揸拿,點知表現再次失準。

(車路士官網圖片)

當然,其實柏度(Pedro)一開波卅幾秒就把握一次失誤入左球,對曼聯士氣打擊好大,車路士就更加唔使同你急。而轉打三後衛陣既車路士可謂越打越順,雖然李斯特城表現倒退,但終究係上屆冠軍,擊敗對方後士氣自然高漲,防守亦都好落力,摩西斯(Moses)同阿朗素(Marcos Alonso)頻頻勤力回防,而且清波果斷,加上不乏頂得之人,曼聯完全攻極唔入,伊巴謙莫域(Ibrahimovic)甚至隱形。


拉舒福特(Rashford)打得其實一般,連加特(Lingard)都叫有一兩下冷箭同入懾,拉仔就直頭無乜精采鏡頭,雖然勤力有嘉,但可能對佢黎講,打大戰仲係差d。而且今仗普巴(Pogba)同費蘭尼(Fellaini)都打得麻麻,防守又一般,又串聯唔到攻勢,對住車路士既三中堅、兩翼衛,再加一兩個防中,成六、七人既防線,雖然係有難度,但二人比起另一中場中既靴里拉(Andre Herrera),表現明顯比較失色。


後場防守都唔夠集中,第一球尚可以話開波無耐,但之後俾車仔狂攻,完全被車路士既高壓防守剋制。上半場夏薩特(Hazard)一次把握角球組織,禁區頂一抽,都已經差少少入埋,下半場個次同簡迪(Kante)、馬迪(Matic)一個配合,後者一劏,夏神一搓又入,兩三腳居然打穿左,甚至簡迪都上身扭入禁區射成4:0,咀都O埋。干地之後都輕輕鬆鬆換入查路拜(Chalobah)、剛克服喪母之痛既韋利安(Willian)(#Respect),以及好耐無見到巴舒亞伊(Batshuayi)落場踢下。


縱觀曼聯顯然表現仲係患得患失,有d似返上屆,唔知想點咁,雖然進攻模式係著重邊路,但明顯以拉仔同連加特打邊唔夠做,中場中又無法有效組織,直至馬達(Mata)入替先有起色,翼位應該用返較強既球員。筆者雖然一度睇好曼聯同車仔,但筆者估唔到摩佬加強自己戰術攻力,又突然中意用小將。不過後防今仗做隊長既史摩寧(Smaling)同拜利(Baily)已經算係咁,只係後者出腳有d過左。(不過筆者好奇點解唔係副隊長伊巴頂上做隊長…)


而車路士顯然越踢越順,變陣後打生哂隊波,前場組織好好,就好似岩岩我講既第三球,默契亦唔錯。上季我地都一度好似曼聯咁,但今季大家都跑多一步,加上摩西斯打爭氣波,助攻助守,雖然防守唔係佢個瓣,但勝在勤力,進攻上佢同柏度都ok,而且有突破力,加上可以同迪亞高哥斯達(Diego Costa)等加強高壓。而鋒線上把握力亦有加強,哥斯達雖然今場就麻麻,但已經係入到7球,係英超射手榜第一,非常唔錯。今仗後,馬迪既助攻都累積到4個,同迪布尼(de Bruyne)、皮耶(Payet)一樣為英超最多。更好係佢多左同簡迪逗後,無壓咁上(因為筆者曾批評過佢成日上太前),而且亦分擔到中場轉守為攻既工作。


今仗既勝仗雖在情理之中,但比數之大卻在意料之外。且睇摩連奴(Mourinho)繼續曼聯風格,重用青訓同不死守,定轉返佢自己既高效足球。而車路士又能否食住個勢,繼續高歌猛進。始終雙曼今季雖然來勢洶洶,但打打下同預期又有所落差,反而利物浦、熱刺等會係大考驗。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: chelsea  

留言


請按此登錄後留言。未成為會員? 立即註冊
    快捷鍵:←
    快捷鍵:→