[淺論歐國盃] 點睇英格蘭 精選

筆者今次先講香港人通常比較關注既英格蘭。筆者都唔止一次講，名大於實既英格蘭，通常好難係大賽有好表現。不過以今年既名單傾向實而不華，加上熱刺崛起帶動唔少年青球員抬頭，若然戰術得宜，未必會打得差，而且年青球員如能汲取經驗成長，未來既英格蘭或者可以真正"實符其名"。


名單上唔難睇到，鶴臣(Hodgson)繼續將當屆打得勁又比較多本土球員既個隊為主去召人，上次是利物浦，今次是熱刺。不過當年入隊既史杜列治(Sturridge)、史達寧(Sterling)等確實有相當實力，史獨無傷下實力絕不比哈利簡尼(H.Kane)及華迪(J.Vardy)差。個人睇史獨傷好唔耐、狀態可能有限，未必有機爭正選，應該會用簡尼出先，or因情況出華迪，而如果唔擺攻中，簡尼拍華迪會有相當效果，一個做控球點、一個走位發揮速度，而把握力都高，位列射手榜頭三。朗尼(Rooney)…我會當佢中場。

中場上應以熱刺、利物浦、李斯特城既主力為主，三隊係防守同快速反擊都各有心得，如果配合得好，佢地既防守能力同活力絕對有助球隊發揮，不過個人睇戴亞(Dier)同占士米拿(J.Milner)拍防中會唔錯，真禾特(Drinkwater)、阿里(Dele Alli)為副，活力同轉守為攻能力都足平衡，不過睇季尾，鶴臣心儀既朗尼應該會打中場，佢既活動範圍大、又擅長傳分邊，轉守為攻、後上都有威力，或者打攻中都得，而巴克利(Barkley)、韋舒亞(Wilshere)都有機，韋舒亞同阿里都可能係攻中/防中轉換。不過出唔出攻中、定出雙箭頭，就睇鶴臣，不過筆者就唔覺應該選韋舒亞，佢場外無紀律就唔在講，而就算佢技術確係數一數二，但傷癒無耐就打大賽，未必踢得好，最慘係鶴臣另一愛將，恐怕應該佢打正選都會有機。
後防左右閘應該都係貝查特(Bertrand)同佳尼(Clyne)，丹尼路斯(Rose)都有機，但感覺都係略有攻強於守，中路就睇卡希爾(Cahill)打成點，因為佢已經係老大哥，唔係既就算經驗少但史東斯(Stones)拍史摩寧(Smalling)既SS組合都絕對唔差。


戰術方面，相信今年會抄李斯特城。同為防反，熱刺同利物浦既戰術同李城都有出入，但整體適應上會比較易，加上英格蘭防守相對擅長，加上在國際大賽，防反如果有效執行，加上中場中路不少防守力強既球員、前場把握力亦不俗，只要鶴臣有力控制戰術執行性，要打好d既成績絕對唔難。加上史達寧、唐辛(Townsend)、拉蘭拿(Lallana)側擊上都唔錯 (雖然筆者覺得唐辛其實麻麻，能力都見底)，如果按對手作出部署做得好，防反會係英格蘭需要確立既風格，而未來亦可按此發展，穩定下來，而非邊隊勁就跟邊隊。

筆者預計(非心水陣)：
前鋒：簡尼、華迪
中場：史達寧、戴亞、朗尼、占士米拿
後衛：貝查特、卡希爾、史摩寧、佳尼
門將：祖赫特


多謝各位不吝賜評，一like一支持，多承指教：
https://www.facebook.com/chelsea.gor.sk