車路士來季青訓的定位 精選

車路士今季表現大跌，來季最多應該有可能打歐霸，但其實可能只係為左打歐洲賽呢個名義，因為眾左X知，歐霸係一個吃力不討好既賽事，除非你係因為歐聯不幸失手，要降格去打淘汰賽，唔係既話其實以佢賽程密度，無乜好處，尤其以車路士既排名，分分鐘由外圍打起，真係玩都玩死。


呢個時候，好多人都認為，應該俾多d機會青訓上位，包括現任看守領隊希汀克(Hiddink)，佢都表示餘下賽季用多d青訓，等佢地多d磨練，早d上位。毫無疑問，呢個絕對係合適方針。尤其係考慮到車路士極龐大既青訓軍團，外借既人材多不勝數，而當中確不乏潛質妖人，例如班福特(Bamford)、卓克(Loftus-Cheek)、艾基(Ake)等。然而，餘下賽季，由於不少一線隊主力有d要休息，有d要操返個態，加上球隊上追不成、下跌不致，佢地自然大把空間可以上陣磨練。但到左下季，係咪仲合適？


筆者所希望既，同好多車迷一樣，想球隊好好重用青訓，但成績又可以改善。不過近日筆者亦有耳聞，有不少車迷認為應大力用青訓，而非收購球員，當然有些意見更為激進，要清埋今季打得差既幾名球員，包括夏薩特(Hazard)、古圖斯(Courtois)、馬迪(Matic)等全部，但大多既方針都係重點係青訓上面。但問題黎啦，君不見阿仙奴當年年年第四，要咁多年先攞返次第三？老實講，無乜幾多人好似雲加(Wenger)咁，得班靚仔仲年年打到歐聯。車路士下季首要任務，係重新確立風格，打返上前四入歐聯，重整旗鼓。如果下季用大批小將擔旗，就算干地(Conte)領軍能力高，恐怕不能係今時今日既英超打入前四掛？你唔可以期待咁易重演以前既阿記同今季既熱刺，用小將打天下，仲要係李斯特城可以爭冠軍、韋斯咸可以爭歐聯資格既英超。


筆者愚見，來季買球星，恐怕在所難免。小將唔係唔用，但既然今季既主力唔可以令人滿意，咁難道靠發揮失準既佢地帶住小將打出表現？甚至賣埋，就要d小將自己踢？明顯年少氣盛既佢地尚待磨練，你睇蘇蘭基(Solanke)，只有18歲，一隊只踢過17分鐘，而外借時係荷甲出25場只入7球，已經話要到5萬鎊周薪同一線隊主力。當然佢有d極端(不過居然有人話ok，俾佢，筆者已笑)，但縱然係有能力既例如卓克、艾基，要係強隊立足，都要有具經驗既球員帶住，慢慢適應，當需要時，有經驗既老將or球星會挺身而出，知道點撐起隊波，小將亦能就此學習，咁先係下季合適既方針。唔係既，要等幾年先打得返歐聯？我地講緊既，係車路士，打少一年，一時失落，ok，但唔可以太耐唔翻身。

btw希望佢唔走而打返起個態


多謝各位不吝賜評，一like一支持，多承指教：
https://www.facebook.com/chelsea.gor.sk