[吹水文] 曼聯選帥有乜條件?

車路士淺論 於 20/02/2016 發表 收藏文章
近黎曼聯既轉會新聞,重點不在球員,而係主帥。相比傳咩咩球星加盟奧脫福,公眾更care邊個接手雲高爾(van Gaal)既帥位。曼聯領隊壓力奇大,雲高爾既沉悶打法,加上莫耶斯(Moyes)敗走在前,下任既主帥好有可能會背負更大期望。除左成績之外,風格都係好重要既因素,因為當年費格遜(Sir Alex Ferguson)既個隊曼聯攻擊力強,入球能力又高,已經令一眾魔迷傾心進攻風格,雖然講進攻可能會諗起巴塞個一種,但曼聯都好強調攻力。


不過而家曼聯既情況唔見得同進攻風格有咩關係。雖然筆者係車迷,但落筆對曼聯無不敬成份,不過曼聯既風格真係無黎霸氣。以前因為佩服費sir執教功力(尤其玩過FM後),對曼聯都有幾分欣賞,不過之後沉哂,失去霸氣。好多人會覺得,曼聯下任領隊要揀個有霸氣既,頂返住。但筆者又唔會咁認為,至少唔係首要。

曼聯要揀新領隊,最好係有個具經驗既領隊整頓啦,但除此之外,筆者覺得最重要既一點係風格明確。摩連奴、施蒙尼打防反,哥迪奧拿重控球,呢d就係風格非常鮮明既領隊。而家既曼聯就好似朗尼(Rooney)咁,風格不明,兩頭唔到岸,雲高爾自己揸唔定主意咁,有時呢個好d,有時個個又幾好,球員都唔知適應邊個先好。如果領隊有確立球隊既戰術風格,唔止令球員有規可循,仲可以按此去執好個陣容,避免d用又唔夾、唔用又曬既球員係度hea,曬大家時間。


另外,當之然係要識發揮球員能力既啦,至少唔會要技術型球員做太多體力化既工作,但又係都要用佢。按材用人,方能發揮實力,唔夾就清,買個有用既返黎,跟住領隊戰術風格磨合,陣容威力先會慢慢顯現。當然,領隊都唔好心大心細,輪換之餘都要確立常用主力,先有空間融入。

至於進攻定防守風格,筆者認為無咁重要,只要球員能力夠而排陣恰當,防守風格都可以靠防反瘋狂入波,不過唔好指望強強對壘or爭標直路都有太多入球就係,否則其實攻與守都可以大炒大勝。


以上筆者純作個人己見,喜則討論,不喜勿插。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: man utd  

留言


請按此登錄後留言。未成為會員? 立即註冊
  • k421 於 21/02/2016 評論 NO. 1

    認同最後 防反唔代表唔進攻 摩佬教皇馬入球都多

  • chango 於 21/02/2016 評論 NO. 2

    曼迷利申,其實是想都系傑斯

快捷鍵:←
快捷鍵:→