[吹水文]英超前五強既轉會(一)：車路士 精選

本欄既為車路士球迷落筆既專欄，當然要提一提車路士。車路士今次既買人重點主要係補強三線既問題，咁岩唔岩、又夠唔夠呢？


首先買返黎既迪亞高哥斯達(Diego Costa)被預期可以解決鋒線既積弱，呢名巴西裔既西班牙前鋒上年幫馬德里體育會贏左西甲同歐聯冠軍，踢法較為爛打型，身體質素同射術都唔錯，被預期係合乎摩連奴(Mourinho)需求既前鋒人選。的確，車路士一直都欠缺入到波又開到路既前鋒。費蘭度托利斯(Fernando Torres)需要係打防反時前方有足夠既空間俾佢進攻，而係佢信心、狀態都不足，加上英超日益增強既壓迫性防守，費托已經好難再打到水準。丹巴巴亞(Demba Ba)被認為係級數不足，伊度奧(Eto'o)又年事已高。不過盧卡古(Lukaku)係西布朗同愛華頓既表現，都被人預期係另一良方，可以返黎成為杜奧巴(Drogba)。不過，拜讀過一d前輩同行既分析後，筆者好同意既一點係，盧卡古雖然身體質素上乘，但由於佢速度都好好，衝撞力反有略減，加上佢係西布朗同愛華頓其實都係打防反之餘，都需求一定自由度同供應，反而同費托相近。

佢被人同巴哥比較，主要係似樣同身形，但其實踢法上，巴哥係更難得既全能前鋒，開路、分波、射波、突破、盤扭、衝撞都得，盧卡古雖然突破同衝撞性都好好，射門入波都具備不俗水準，但缺乏左開路既作用，去俾一眾後方既進攻中場後上，而夏薩特(Hazard)、奧斯卡(Oscar)等都射優於傳，比起傳波係前鋒，相信發揮起黎會係要前鋒開路拉位俾佢地上機會大d。不過夏薩特可以將創造機會轉化成助攻既機率提高，加上舒爾利(Schurrle)可以繼續加強傳中能力，相信都有助前鋒發揮。不過得既買個開到路既前鋒就最好啦。
而中場中上，馬迪(Matic)防守上極為出色，而相信佢都會拍法比加斯(Frabegas)，一攻一守，而法比仔既傳送、控制節奏等方面，都可以令上季進攻上老鼠拉龜既情況改善。佢既派牌力相信可以令進攻昇華，同埋進一步令車路士既反擊更具威脅。不過車路士都買買多個強力防中，拉美利斯(Ramires)同米基爾(Mikel)都唔算可靠，而對陣強隊需要以穩守為先下，要買返個上季大衛雷斯(David Luiz)既防中代替品。


而後防上買左路爾斯(Luis Filipe)後補充返左閘，但長遠都要個左閘接班，話實佢都29了。而且中堅上都有d促襟見肘既情況，就算提拔蘇馬(Zouma)都要買返個具經驗同實力既替補，況且蘇馬應該會借出去機會較多。

車路士現有人腳其實都可以打得既，以摩佬功力可以應付，不過可以清去一d唔算好可靠既球員既話，不妨再加以補強。

一like一支持，多承指教：
https://www.facebook.com/chelsea.gor.sk