雲高爾咁對龍門，好嗎？

荷蘭岩岩世界盃玩完，要等下屆再係希汀克(Hiddink)麾下再戰。今屆雲高爾(van Gaal)多次作出巧妙而有效既調動，帶領荷蘭過關斬將。最驚人既莫過於八強換龍門，練黎打12碼既告爾(Krul)建下奇功，而施里臣(Cillessen)就sad啦，無啦啦被換走，事後雲高爾都話過之前係無話俾佢知互射12碼會換佢走，佢亦係換走後仍詫異地望著第四旁證既牌，然後踢水樽。賽後焦點係雲高爾既大膽調動同告爾既特別守門法上，然而之後四強換唔到，唔擅守12碼既施里臣偏偏一球都救唔到，四強出局。


現時最興兩種講法：
1) 雲高爾好唔尊重門將施里臣，換走佢仲要係咁讚告爾，間接話佢廢
2) 施里臣唔夠以荷蘭既勝利為大前提，太小氣

拿，其實兩樣都合理，無話邊個岩。雲高爾其實出名手腕強硬，治軍極嚴，而且永遠以贏波為前提，就算雲佩斯(van Persie)都可能被換走，基本只要狀態不足、或者對佢戰術無幫助既，咁就一定會被換走，甚至無得上陣。施里臣可能係出迎等其他方面比較全面，所以係上陣首選，而告爾撲救、捉路等更好，所以守12碼。呢個可能係依門將特點，係唔同情況用唔同人。呢個同用全能d既雲佩斯，或者觸覺特別強既亨特拿(Huntelaar)一樣，其實都係一樣。
不過雲高爾雖然作風強硬，但其實應該講野婉轉d既，佢都出名於同球員關係唔算好。不過其實係雲高爾既情況黎睇，佢只係國家隊教練，一定要以球隊贏波為先。國家隊唔同球會，多數既領隊都係短期d，對球員既關係可能未必要好好，反而強硬d咁反而令大家進步既積極性好d都唔出奇。而施里臣可能認為自己守足120分鐘，應該有能力、資格、信心去守埋12碼，可惜事與願違。不過佢咁諗唔出奇，但唔應該向傳媒呻，破壞球隊和諧，而且作為球員應該服從領隊既指示同要求既，就算要質疑，都應該私下向領隊傾，而唔係向傳媒爆，咁其實係職業操守上唔太好。


黎緊雲高爾教曼聯，可以預期佢疑人不用，用人不疑，作風會繼續強硬，不過如此行逕應會少見，始終教球會既同球員既關係比較重要，但佢同摩連奴(Mourinho)一樣都係極串，可以預期佢會語出驚人，但如此既情況但願唔會再出現。