[八強戰評]霸氣不足既德國 精選

鑑於事忙同某電視台轉播既問題，筆者都久未完整睇哂一場波，到八強終於睇返德國對法國呢場大戰。不過呢場真心唔算特別好睇，至少無達到我既預期。


今場德國可謂攻強守弱，進攻上德國既小組入滲依然美妙，傳送走位都多次成功撕破法國既防線，高路斯(Klose)作為惟一中鋒，已經36既佢d走位同觸覺依然幫助到德國既進攻。

然而，德國既中後場表現就一般，中場上舒韋恩史迪加(Schweinsteiger)多次攔截，但動作上稍嫌過硬，但都有唔少算係戰術犯規既；但佢既拍檔上，卻奧斯(Kroos)傳送頻頻失誤，傳中、角球、長傳都唔算非常準繩，唔係正常水準；而基迪拉(Khedira)到而家好似都仲未入局咁，傳波唔準、控波甩腳、攔截唔好，佢被人省中個下(高路斯射門被解圍個下)，其實我睇完唔明佢點解係咁近既位置上、有乜作用。
後防上其實都包唔少越位、加上旁證時不時失準睇漏，經常被突破越位，而且亦睇漏幾次賓施馬(Benzema)，尤其係左路傳俾佢既波，唔少都係見到佢可以射到波。

不過法國今場發揮更差，由於德國控球力強，加上中路強勁，法國似係唔同佢硬搶，轉用邊路+長傳既戰術，華保拿(Valbuena)同基沙文(Grezmann)傳送或突破，搭上由前線賓施馬等前鋒接應，憑個人能力攻門。然而咁樣既戰術套路發揮就唔算好，唔同德國硬食就係造成門前屢見驚險既結果，再被人入埋波。不過慢慢法國開始入局後都把握上述德國既問題，進攻上一度係唔錯，不過把握力唔好，唔係就有機會追返平。


黎緊德國下一場對巴西，進攻配合上係無問題，中場都算，唔出基迪拉(Khedira)已經都ok，但後防要執一執，唔係一味靠清道夫中場紐亞(Neuer)真係久守必失，何況今場尤其上半場見到紐亞企位都幾出，雖然佢反應極強，而且信心強係好，但太自信會出事，希望佢謹慎返d就更好。