[戰評]無奈既英格蘭

車路士淺論 於 15/06/2014 發表 收藏文章
今場英格蘭都打得唔算太差,轉變後既打法同人腳配合對住意大利都發揮唔錯,可惜佢地有三大失誤,即刻足以輸波,而且係1:2算少。


其實英格蘭今次既佈陣都係出左唔少精銳,而且都好明顯係利物浦既打法基礎上改變,朗尼(Rooney)係打蘇亞雷斯(Suarez)係利記既位,負責串聯中前場、分波或者後上攻門,不過朗尼繼先前既自大言論後,雖然整體唔錯仲有球靚助攻,可惜又用唔多亮點既表現同低級錯誤去反駁自己。個球助攻佢走到個位,出左球靚curve俾史度列治(Sturridge)射入追平一球,之後有球引球推進去偏右位置起腳,防守時都頗為勤力,鶴臣(Hodgson)今場唔錯既擺位就係將朗尼放係左路,俾佢係邊路助攻or入中路組織,之前有位fanpiece既前輩都講過朗尼可以一試邊路,當年08/09球季曼聯打得好好,朗尼就係打左路。可惜佢唔算打得太好,仲開球"底線傳底"既角球。
意大利既進攻打得唔錯,主要係右路進攻,客串左閘既中堅基亞連尼(Chiellini)就專注防守,唔使做佢唔擅長既助攻任務。而右閘既達美安(Darmian)好生猛,頻頻助攻,開賽初段先經多次傳中,只不過祖赫特(Joe Hart)多數都接到,威脅唔大咁解。不過睇睇下相信大家都諗:點解右路斬極都有?無人防咩?又真係無乜,拜恩斯(Baines)雖然會上去助攻,但都有回防,而英格蘭整體既企位截波同搶斷都ok,不過針對性既mark人真係無乜,呢樣打開防守波既鶴臣竟然無調整返,筆者都感到奇怪。尤其是頻頻傳中既達美安,呢個係第一個失誤。


第二個係好少睇實對方既靈魂人物派路(Pirlo),要知派路既派牌能力好強,但往往佢都無人貼身俾壓力佢,佢可以輕輕鬆鬆派牌、睇定黎食。中場既球員除左軒達臣(Herderson)外防守力唔高,但連睇下既人都無,方圓幾米內都無人,派路梗係輕鬆,唔怪得意大利無乜創造型球員都攻得好,而且仲好好咁利用邊路,由派路分邊or長傳入禁區。而且佢地防線多數係年約30上下(或高d),經驗老到而且夠定,都唔使前場過多跑動去協防,令意大利運球比較流暢。

第三個就係打逼搶而無關注到體能問題,打到後段,史度列治、史達寧(Sterling)、隊長謝拉特(Gerrard)、加利卡希爾(Gary Cahill)悉數抽筋,但換走既係傷傷地既史獨,同埋體能較好既軒達臣、韋碧克(Welbeck),而且入替既人中,用巴克利(Barkley)係唔錯既一招,加強突破力(雖然佢唔多發揮到),拉蘭拿(Lallana)既作用都叫ok,但以韋舒亞(Wilshere)入替軒達臣而非抽筋既謝拉特,就令人非常好奇,而且呢一步明顯減弱左唔夠既中場防守力,真係好奇怪既一點。而尾段個個都無力斬波,角球都要輪住斬,仲要傳中多數斬出底線以外。


不過英格蘭可以當佢試陣only,但想打返好,以上三點必要改善,其他其實都算唔錯,d配合同組織開始有個型係度,如此發展係岩既方向,對意大利都係一場好既經驗去改善,趁住今屆俾人睇淡,好好練下d年青球員,練好個陣形打法仲好。

一like一支持,多承指教:
https://www.facebook.com/chelsea.gor.sk
標籤: england  italy  world cup  

留言


請按此登錄後留言。未成為會員? 立即註冊
    快捷鍵:←
    快捷鍵:→