[揭幕戰評]可惜既克羅地亞 精選

尋晚筆者好好彩起到身，欣賞到呢場世界盃揭幕戰，雖然場波係幾好睇，不過都頗有一d值得注意、討論既地方。馬些路(Marcelo)攻入一個烏龍波成為今屆第一球，係有d令人幾哭笑不得，不過尼馬(Neymar)個球都相當刁鑽，其實觀乎兩隊既表現，和波會係更合理既戰果。


講下巴西，老實講巴西今場打得真係麻麻，明眼人都睇得出巴西踢出黎既水準無洲際國家盃得陣咁好。睇返數據上，巴西既控球率係多過克羅地亞既，佢地既成功傳球都比對方多左四成左右，不過其實中場磋唔上去，回傳返後場既時間比較多，克羅地亞既球員非常努力咁逼搶，巴西運球個方面係幾吃力，克羅地亞球員既跑動距離比巴西多一公里左右。不過其實巴西確實不愧係足球王國，佢地既技術確係唔錯，好多時既傳球都顯現到佢地既腳下功夫，尤其是大衛雷斯(David Luiz)、馬些路、尼馬等幾個重心球員。


兩隊中都各有一個球員可以作為球隊表現既縮影。巴西係尼馬，上半場有d被克羅地亞快速壓迫既節奏打個措手不及咁，之後慢慢hold返定，打返一段好波，入返一球，不過下半場又沉寂返，無甚表現，直到個個有爭議性既12碼出現，又開始打返d好波，尼馬下場後奧斯卡(Oscar)就再入一球鎖定3:1勝局。克羅地亞就係摩迪(Modric)，佢一如係皇馬既表現，非常勤力跑動，而且傳球巧妙，不斷嘗試組織攻勢，而目測好多都幾具威脅，一度令巴西受壓，上半場就壓到佢犯錯得到一個入球，可惜下半場球證既判罰屢屢對克羅地亞不利，加上不滿及壓力微生，無力再入球。

不過兩位領隊都算果斷，克羅地亞知道巴西控球好過自己，但機動性己隊佔優，就打更直接既攻勢，以不俗既長傳分邊傳中撕破防線，可以搶點既球員唔夠巴西後衛頂，而巴西換入靴南尼斯(Hernanes)、巴拿特(Bernand)加強進攻，收起表現唔搶眼既侯克(Hulk)，領先後就收起尼馬換入拉美利斯(Ramires)加強防守都係合理調動。

巴西雖然今場得勝，但表現沒足夠說服力，面對克羅地亞既機動性打法，表現得有d失措，但好在技術搭夠，加上有d幸運成份得到一球12碼，奧斯卡個球亦實在入得出色，不過係世界盃要走得遠，一定要再改善，唔係對上強隊就未必可以得勝；而克羅地亞其實都交足功課，表現不俗，不過後段有些球員確實有d情緒控制得唔好，要再冷靜細心組織返，hold返住場面謀求反擊，先可以突破到更後階段。
不過值得欣賞係兩隊球員都十分投入認真，跑到無氣，尾段奧斯卡抽筋，而鏡頭都影到克羅地亞中後場個個都彎腰扶膝，喘哂氣咁，呢個精神係值得欣賞。


一like一支持，多承指教：
https://www.facebook.com/chelsea.gor.sk