[吹水文]點睇邊個係下任紅魔領隊？

莫耶斯(Moyes)被炒後，其實近黎都越黎越多人加入分析邊個會接任曼聯主帥一職，我無各位前輩咁pro，但都想隨筆一談吹下水，分享下意見。


最熱門既係雲高爾(van Gaal)，我知道有呢個人既時候佢係教緊拜仁既，就我所知，佢比較願意起用新人，曼聯亦正係重整期，起用新人上相對比較係一個值得考慮既一點，沙夏(Zaha)、贊奴沙(Januazj)等相信能得到機會上位，有所進步。而且佢作為成名既名帥，係壓場感同臨場表現點都好過相對保守既莫耶斯。不過由於佢對人事上聽講係處理得無咁好，恐怕唔會係長教既人選。


次熱恐怕都可以話係高普，佢充滿活力既性格同執教風格，可以為呢支曼聯注入生氣。佢亦可以將曼聯既風格進一步確立到快速推進既行軍方式，亦有助陣中技術型球員如香川真司(Kagawa)、馬達(Mata)、甚至係蘭尼(Nani)等發揮水準。考慮到佢既年齡，可以係長教之選，不過佢對多蒙特好有感情，好難挖到佢黎。


亦有傳搵費sir(Sir Alex Ferguson)出山，但曼迷都恐怕唔想再俾呢位年逾七十既傳奇再咁操勞、消精費神去執教，而且就算係，搵接班人既問題依然存在；而用傑斯(Giggs)都唔係好主意，佢雖然係好專業既球員，亦係曼聯中好有名氣同資歷既人，但佢場外既名聲似乎因為弟婦門事件而受損，加上佢資歷不足，係現今球壇同曼聯高層處理莫耶斯一事上，似乎唔係作為執教生涯既起點。


個人認為較好既人選會係蘇斯克查(Solskjaer)，雖然佢教卡迪夫城表現不算好，但佢都只係走馬上任，無足夠時間俾佢建立自己既風格同班底，觀乎佢係曼聯預備隊既三年經驗同係挪超兩次奪冠經驗，加上紅魔名宿身份，會係唔錯既優勢，佢始終都有經驗，加上名宿手份相信壓得住場，曼聯預備隊既經驗又令佢有能力起用新人，反正都係重整期又有莫耶斯最差既例子，曼聯高層可能俾到更多時間，蘇斯克查係莫迪都有所改革，相信都有助曼聯重整。