[吹水文]淺談暴發戶球會既成長 精選

由於足球事業日益發展強勁，對經濟既掛勾已越黎越明顯，好多有錢人、油王都開始有興趣於投資足球事業，無論係基於中意足球定係想分一杯羹。近年黎，最出名既暴發球隊(註：係突然有錢，唔係本身一直都係有錢既豪門勁旅)，遠既有車路士、曼城，近既有摩納哥、巴黎聖日耳門，閒來睇到篇文提到，今日就吹下水講下有呢d球會。

我認為，一支暴發球會要成長既，會經過四個階段，而上面提到既球會中有三個可以做到幾好既例子而筆又都頗有了解既，筆者就用呢三隊講下，分別係車路士、曼城、巴黎。筆者希望盡量達到客觀中立咁吹下水講下意見，希望不同球迷包涵，利申筆者係當然既車迷啦。

言歸正傳，首先第一個階段就係天價買人。
呢個係好自然既現象，好多人發左橫財，好似中左六合彩咁，無啦啦有筆錢，唔少都起碼會去食餐又好又豪既先，球會都係咁，突然一有錢就財大氣粗，以上三隊都有經歷過，車路士先後收購左林柏特(Lampard)、杜奧巴(Drogba)、馬基利尼(Makelele)等著名球員(當然而家都有唔少大筆收購，後面會再講)，曼城亦簽左羅賓奴(Robinho)、大衛施華(David Silva)、當年既艾迪巴約(Adebayor)等，而巴黎就收購左伊巴謙莫域(Ibrahimovic)、柏斯度利(Pastore)、泰亞高施華(THiago Silva)等。
呢個時候既收購，多數係為左即時將球會既實力同名氣大幅拉高，變成一隊有高戰力既球隊，不過好多時都會忽視咗長遠既發展，例如青訓小將既上位空間、更衣室既和諧性、轉會費對球員既壓力等等唔同方面既問題，而呢d問題要解決既其實同錢就無乜關係。暫時巴黎聖日耳門就處於呢個階段，不過幸而其戰力同球員之間都無大問題，加上法甲水平相對上競爭不大，仍係健康既情況。


不過咁樣起碼已經對球會成長為真正強隊已踏出左第一步，慢慢就會成長到第二個階段。呢個階段仍會有大手收購，不過唔同既係，上一個係買一批人返黎同搵個好既教練將佢地合成一隊有戰力既球隊，而呢個階段就係開始建立一個自己最好既風格同踢法，培養自己既特色。曼城就正處於呢個階段，呢個時候開始唔會亂咁買人，而係嘗試針對性既收購，補強位置去提升自己風格既威力，不過當年車路士第二任就請左摩連奴(Mourinho)，想比曼城請左曉士(Mark Hughes)同文仙尼(Mancini)，當年既車仔無疑更快確立有效既風格：鐵血防守，而到依家車路士既防守一直都依然係令人頭痛既地方，包括2012既歐聯，而曼城而家都成功建立一套風格，就係強橫既進攻能力。真係學摩佬話齋，就現階段，曼城既攻力加上已經幾年既既有班底，相比調整緊既車仔會係強d，而兩隊繼續發展落去，邊個勁就真係拭目以待，因為兩隊都有左好好既風格。

而第三個階段，就暫時係車仔者，曼城似乎係希望贏返多d冠軍、提升多d名氣同吸引力先正式上到呢步。呢個階段就係開始加強青訓同收購小將咁既未來投資，達到持續都有強大既實力。車路士今季外借以待成長既小將達23人(好似係，如錯求指正)，未來用呢批小將做骨幹、保持競爭力之心已路人皆見。古圖斯(Courtois)、盧卡古(Lukaku)、皮亞桑(Piazon)、T.夏薩特(T.Hazard)、奧美路(Omeruo)、艾基(Ake)等都係出名既新星，加上現有陣容中既年輕球星如夏薩特(Hazard)、奧斯卡(Oscar)，未來幾年都不愁無人用。
第四個階段就係建成王朝，同真正具歷史深度既強隊，即係文首提到一直都有錢個d球隊死過，例如皇馬、巴塞、拜仁(、曼聯)，呢d球會都係極具名氣既傳統勁旅，而且不乏財力，當成長到呢個階段，就可以同佢地係各方面(即係榮譽、名氣等)一較高下啦。

大家既球隊又屬於邊類同邊個階段呢？不過點都好，你都會支持球隊、希望贏到所能贏既冠軍，但同時，唔同球會都有低潮期，大家都係繼續支持，我地球迷擔當既角色，無論邊個階段既球會，我諗都好重要既。

不過我要講清楚，實力呢d野就同我講既階段無關，因為太多戰術、狀態等因素，未必只同發展階段有關，亦無話我地發展到後d就勁d既。