世界盃中的車仔焦點 精選

個個都講緊世界盃喇，仲有三個幾月(筆者有無講錯？)就開鑼，大家都開始期待邊隊有好表現、邊個球員會有耀眼演出。筆者少不免都要講下有關話題啦，筆者就講下啦。咁作為車路士球迷，當然我都想睇到車仔球員可以係世界盃有好好既發揮啦，以下就分享幾個筆者好想睇下佢表現成點既球員。

第一位：夏薩特(Hazard)

作為今季其中一位演出最奪目既球員，當然係眾人焦點所在。夏神既盤扭、射術、傳送都係日漸成熟，令球隊左路既威脅越黎越大，係國家隊既比賽筆者比較少睇。但觀乎今季表現，應能負責不少進攻責任，加上國家隊中有唔少拍檔比車仔既隊友都唔遜色，例如賓迪基(Benteke)、米拉拿斯(Mirallas)等進攻好手，當中有d甚至係對防守表現聞名既車仔都有唔少威脅。夏神只要同隊友擦到火花，以夏神有時可以負起絕殺重任既心理質素，應可以帶領新黃金一代既比利時走遠d，作出上佳發揮，再進一步昇華自己既水平，成為車仔既C朗美斯。

第二位：大衛雷斯(David Luiz)

雖然雷斯係26歲，不過我知道有雷斯呢個球員以黎其實睇過佢係國際大賽既表現機會唔多，最近都係洲際國家盃，而有住泰亞高施華(Thiago Silva)呢位咁勁既中堅拍檔同巴西進攻風格，個人覺得雷斯表現都唔錯，尤其對西班牙一役，對對方中路既防守實在係好好。雷斯夠撞、有速度、敢上前助攻，加上個人覺得佢既超長傳其實幾有用，而係巴西仲有尼馬(Neymar)、侯克(Hulk)等有技術、身位優勢既隊友接應，佢應該有得發揮。不過都係個句啦，雷斯改善下防守表現，例如出腳時機、有時既企位等問題，佢其實係好勁既中堅，或者向泰亞高施華學到野，返黎會為車仔踢更多好波！

第三位：林柏特(Lampard)

呢屆幾乎肯定係林伯最後一屆參與國際大賽，作為第二個中意既球星(第一個係朗拿度(Ronaldo Luís Nazário de Lima個個))兼支持車仔後既第一個偶像，筆者當然想睇到林伯既表現，雖然比起做埋隊長、轉型又轉得好掂既謝拉特(Gerrard)一定少好多出場機會，但筆者認為林伯一d都唔比謝拉特遜色，佢既重炮尤在、又有經驗，上場對愛華頓補時開罰球奠勝就係好例子，雖然筆者已經唔再支持英格蘭，但我仲好想睇多d林伯係世界盃演出。

第四位：費蘭度托利斯(Fernando Torres)

你無睇錯，筆者都無打錯，作為其中一位無放棄費托既車迷，都好想睇下佢係世界盃有咩表現，尤其佢岩岩就係歐聯成為十六強首回合惟一一個幫英超球隊入波既球員。費托本身都係出名既大賽球員，可能你話佢符碌，但符碌佢又入得到，心理質素其實都有，至少有信心同鬥心，咁就有機會。好多人都講過，費托係英超係沖撞性唔夠，大多控球緊逼型球隊又無乜俾佢爆既空間發揮，但呢d英超先多，其實佢係歐洲賽等發揮其實幾好，加上入唔到波後佢既無球走位、傳送其實都係好左既(因為入唔到波都要有野做)，仲次次都係大賽有所發揮(好似歐國盃同洲際國家盃)，話唔定佢keep得好、入選到、世界盃踢得幾好呢。

其他球員筆者都幾想睇下佢地打成點既，例如奧斯卡(Oscar)、圖中既艾斯派列古達(Azpilicueta)同已離隊既馬達(Mata)。
奧斯卡跑動勤力但盤扭、後上火候未足，期待經世界盃洗禮，心理質素進步，亦可以係隊友度學習更多；Azp個名好難串，但一定記得佢串演左閘好掂，不過佢應該打右閘機會更大，而可以打埋左閘就會係增加入選、上陣本錢，加上佢跑動、防守都幾好，仲可以交到d助攻，都幾想睇下佢打成點；而馬達…可能係曼聯斬波斬得多，西班牙會視之為破密集良方，都有上陣機會，筆者都想睇下佢係大賽發揮，西班牙次次大同小異既陣容有時真係好少見到佢。

由於筆者此文按個人喜好而寫，車仔踢得好又打世界盃既未能盡錄，但都希望佢地有好好既發揮啦，尤其係唔知入唔入選到既舒爾利(Schurrle)、拉美利斯(Ramires)、A高(A.Cole)同埋唔知打唔打返既泰利(Terry)等等啦。至於筆者支持邊隊…你按次序睇下球員既國籍咪知囉(除去英格蘭)。