開左季，係時候黎估下車路士今季會點排陣 精選

所有車迷都會諗到一個問題：點先係車路士最佳陣式？就算唔係車迷，相信都會好奇於呢個問題。係英超開季後，相信摩連奴(Mourinho)心中對呢個問題，可能都有一個大概既答案。

觀乎近來既排陣，前鋒位置應該都係會用伊度奧(Eto'o)作第一選擇，雖然已屆32歲，但佢俾到摩佬既信心，比起狀態未起既費蘭度托利斯(Fernando Torres)同丹巴巴亞(Demba Ba)大，對曼聯一戰竟排出半無鋒陣，雖說中場好手夠多，但也說明對陣中兩名正前鋒能力既質疑。不過個場都排出左可客串中鋒既舒爾利(Schurrle)，加上而且摩佬對發揮老將實力向來都有一套，也不用擔心鋒線戰力既問題。而且費托跑動其實都算幾勤力，走下位都有拉空作用，巴巴都有身體質素，就算後備都有作用。

咁伊度奧等人身後既攻中線又如何呢？夏薩特(Hazard)始乎有力說服到摩佬，甚得重任，係舒爾利有時可能會推上前鋒位置既情況下，夏神應會佔據左翼既正選位置。進攻中場就應該會係迪布尼(Kevin De Bruyne)同奧斯卡(Oscar)之爭，兩者既組織能力、串聯能力、後上能力都唔錯，前者身體質素較佳，後者走動較勤，摩佬應會按對手風格同狀態決定何人出任此位。當然，韋利安(Willian)同馬達(Mata)都有能力係呢個位發揮水準，亦有力挑戰，但現時看來，奧斯卡應佔上風。同時，迪布尼、韋利安、馬達都可以出任右翼，而從摩佬既風格黎睇，技術較為純熟既韋利安同馬達機會較大，當中上季有頂級表現、加上具切大位既左腳既馬達又有住更大機會，所以除非摩佬又玩返皇馬雪卡斯拿斯(Casillias)個招，唔係既馬達應能佔一席主力。不過老實講，由於五人既可塑性都好高，摩佬戰術能力又夠，隨時大換位都唔出奇，不過大概會係小杯賽or對下游球隊先會，正常黎講，應會同我上述所言，較合以穩為先既摩佬作風。

防守上，防中應會由林柏特(Lampard)、拉美利斯(Ramires)任正選居多，米基爾(Mikel)又走又唔走，雲根基爾(van Ginkel)反而可能多d機會出，佢既能力都唔錯，熱身賽踢落都ok，有機會體驗下英超。而唔講部分人可能無為意，麥伊治蘭(McEachran)其實係留隊既，佢既傳球能力其實幾好，摩佬指點下有望進步，同雲根基爾出下起汲取英超既比賽經驗，又可以俾林伯、拉美有人手輪換下。
後防線A高(A.Cole)係左閘絕對主力，全隊正選位置係佢同施治(Cech)最穩架啦。中堅上從摩佬所言(即使可能係策略)，可見佢對大衛雷斯(David Luiz)頗為重視，以佢既防守調教能力，雷斯有力一改輕進作風，更穩陣下應會佔據一個主力位；而佢既拍檔，睇呢幾場似乎係加利卡希爾(Gary Cahill)既機會大d，泰利(Terry)呢位隊長係狀態開始下滑下出場機會應會減少，而且可任中堅既卡拉斯(Kalas)亦可能會出下。右閘上經驗優勝既伊雲奴域(Ivanovic)睇黎較得摩佬信任，但艾斯派古達(Azpilicueta)防守表現唔錯，亦係勤奮之輩，合乎摩佬用人原則，二人均屬穩健之輩下，上陣機會應該都唔會少。

大致上就係咁，呢個係我對車路士排陣既睇法，摩佬以穩為先，加上佢既能力、威信，我諗比起同樣換帥既雙曼，我地機會相較大。不過新挑戰者中，大換血既熱刺未必要驚，反而要小心日漸融合進步既利物浦就真。