車路士中場備受爭議，咁應該點排呢？ 精選

上次講完前鋒，又要講下中場。車路士既中場已取代後衛既鐵血球風成為車路士既標誌，尤其是三核。明顯，車仔已經趨向技術進攻+鐵衛防守既方向，中場自然係好重要既位置，不過眾所週知既係，車路士既中場人才鼎盛之外，都有唔少問題。

第一，係奧斯卡(Oscar)既定位。從摩連奴(Mourinho)近期既排陣可以睇得出，奧斯卡係進攻中場既首席人選，佢有技術、有腳頭，而且跑動、攔截都好勤力，對重視球員效率既摩佬黎講佢無疑係出色既。不過，對我黎講，佢既然有足夠體力、良好既攔截同傳球效率，我認為佢應該打 4-2-3-1 中 "2" 既其中一員，不僅可以更好咁運用佢既跑動能力，而且佢既傳送能力可以打到派牌既位，同時又有一定防守能力，類似而家想林柏特(Lampard)打既位。當然咁既話最好搭米基爾(Mikel)一剛一柔，唔係就要避免對硬淨型球隊出，唔係就拉美利斯(Ramires)或者再收購硬淨型防中。另外亦都騰出到位置俾上季歐洲助攻王馬達(Mata)。

夏薩特(Hazard)如無意外應會keep住打左翼，但摩佬要亦應該會執執佢既踢法，要多d配合下隊友。舒爾利(Schurrle)似乎會打右翼多，咁馬達其實可以打返中間，只要提升返回防意識，佢既傳球準繩度可以組織攻勢，亦可以增加反擊效率，佢已效力左兩季，配合同適應球隊、英超有好大優勢，韋利安就可以作為任何一個位置既替補或變陣助力。

簡單d講，打4-2-3-1既，"3"就夏神、馬達、舒爾利/韋利安，"2"就奧斯卡/林柏特、拉美/米基爾，4-3-3既就奧斯卡、拉美、林伯之中兩個打前，米基爾打單防中都ok。另外真係要收購多個防中，睇型再睇點轉點配合，唔係既話摩佬戰術上中場一亂就玩完。