賣哥斯達就要買盧卡古？買盧卡古不如留哥斯達？ 精選

隨住球季完結，轉會市場當然開始活躍，各種轉會傳聞亦都傳出。車路士除左防中及中堅外，前鋒位置既出入都備受關注。近日最新消息，就係一直希望收購哥斯達(Diego Costa)既中國球會因為各種問題，好大機會唔會收購佢。

問題就黎，唔少對車路士來季鋒線既猜測，包括筆者，都係建基於哥斯達離隊既應對。如果哥斯達留隊，其實都亂哂，因為人腳數量、轉會資金都要重新諗過估過會點搞。暫時綜合返佢既去向，似乎有兩個可能性，一個係重返西甲，一個就留隊續約。

先講返前者，重返西甲，惟一會攞高額轉會費既不外乎巴塞以及皇馬，但兩者都無可能收購佢。馬體會係最大機會，亦有一定財力，但費用絕不會高(以現時轉會費咁高而言)，咁套現返黎既資金都有限，買人就多少少制肘。加上目標之中，盧卡古(Lukaku)所屬既愛華頓唔做蝕本生意、莫拉達(Morata)所屬既皇馬買人本來就難、比洛迪(Belotti)定位亦屬潛質妖人，無乜邊個易買，盧卡古既離心相信稍高，機會較大。不過雖然盧卡古比較年青，但哥斯達配合度同作用更高，盧卡古係作用上不及，戰術上必須調整，加上夏薩特(Hazard)要hold波，盧卡古亦係少少上腳，夏神都話可以帶波上去，盧卡古並非高速、果斷之人，雖然把握力不俗，但要佢好似哥斯達咁回後配合既，佢攞波可能會拖慢節奏同反擊速度，但前面等波又令全體戰術有缺口，難搞，戰術一定要微調，季初成績一定有波幅。
圖片來源：gettyimage

如果哥斯達要走，其實反正要微調戰術，買盧卡古倒不如用巴舒阿伊(Batshuayi)，其實只要稍作調整同加強磨合，佢有能力發揮，今季季尾對西布朗一戰，都係由佢一箭定江山，成功提早奪冠。加上據說回收既阿伯拉罕(Abraham)，可能反而令戰術更立體，二人身高應有效交出比哥斯達更強既制空力。如嫌深度或經驗不足，其實如早前曾傳聞過既洛蘭迪(Llorente)也可，雖然年紀略大及靈活度稍差，但作為備用人選應勝任有餘，加上適應了一季英超，應有所發揮。


如果哥斯達留隊，成績上可能反而比較理想。不過問題係哥斯達要再一步留意自己，雖然可能減低前線騷擾力，但應少些小動作，否則好容易俾人針對。其實以佢能力及入球能力，加上夾左都一段時日，發揮上係好既，佢係真係適合戰術，好難搵個類近風格又夾到既。但如果佢留隊嘅，即使提拔返一兩位小將如阿伯拉罕之流上一隊，亦不過等佢同哥斯達輪換下做下佢副手，加上有巴舒亞伊，上陣分配上可能佢會佔去大多，若及後佢離隊，可能引致斷層問題，要知車路士前鋒問題一向不易解決，如不及早有多手準備，會難搞好多。


多謝各位不吝賜評，一like一支持，多承指教：
https://www.facebook.com/chelsea.gor.sk