莫耶斯應去應留？ 精選

此文既出，我預左俾人話，但作為英超球迷，都想講下呢個最heat之一既話題。不過由於筆者唔係曼聯既球迷，可能無各位睇得咁透徹，純粹一抒己見而矣。不過肯定既係唔好叫費格遜(Sir Alex Freguson)返黎啦，盡心盡力咁多年，唔抖下咩？相信諸位曼迷都唔忍心啦~

其實今季英超，人人皆知係近年黎競爭最激烈既一季，不少中下游份子開始有一套具威力既戰術同不俗既陣容，愛華頓、西布朗、等實力份子繼續有補強，連升班馬都有過千萬既投入，修咸頓更豪簽雲耶馬(Wanyama)、奧斯華度(Osvaldo)及路雲(Lovren)，豪門中車路士重召摩連奴(Mourinho)及花費6000萬鎊引援，曼城聘用名帥比歷連尼(Pellegrini)、投入7600萬增兵，連雲加(Wenger)都簽左奧爾斯爾(Ozil)返黎。相較之下，曼聯雖然係衛冕冠軍，但至今既表現亦指出左各潛在新兵點解唔黎，就係對莫耶斯(Moyes)既能力、經驗有所懷疑，同埋佢不比費sir咁有吸引力說服新兵來投，只係簽左費蘭尼(Fellaini)呢名具質素既引援，仲係最後關頭先買到，佢係起跑線已輸左。曼聯本身陣容其實都有問題，不過費sir多年功力，加上雲佩斯(van Persie)同朗尼(Rooney)等支撐才成功奪冠。

當年費sir初掌曼聯，都唔係一支強隊，功力尚淺既費sir都用左幾年先建立到自己既曼聯出黎。莫耶斯手下呢支曼聯都係有不足既地方，即使佢地係衛冕冠軍，但高峰後總會有下坡，而且費sir當年有不少後期係球星既球員係低價簽入，就算莫耶斯買人眼光有費sir咁高，如果佢買d唔出名既，曼聯球迷都會不滿，而且佢得到既時間、壓力亦不容許，但又不夠魅力羅致球星，致形成今日局面。本來佢簽入愛華頓既舊部係唔錯既一步，但佢上季太早宣布做費sir接班人，難免影響形象，所以除左費蘭尼肯黎之外都簽唔到。

此外，佢係愛華頓既成功，佢既訓練方式應記一功，但比起曼聯情況又唔同，加上佢既調動風格同曼聯人手唔同，佢都要時間去嘗試融合自己風格入曼聯或調整。無可否認莫耶斯在隊可能對我地呢d唔係曼迷既人所支持既球隊短期有著數，但我覺得佢始終係有能力既人，至少去到一月，俾機會睇下佢會點執、有無能力補救先，都係唔掂先至炒。我盡力客觀唔講架啦，我好認真評論，唔係你炒左仲亂，我地咪仲著數？