淺論點睇利物浦請高普 精選

車路士新聞講到"噚"，睇下近期新焦點利物浦。利物浦換帥同車路士都頗有一d關係，被炒既前主帥羅渣士(Rodgers)系出車路士青年軍，新任主帥高普(Klopp)就被傳係潛在既主帥候選，更有指因為車路士有興趣係摩連奴(Mourinho)無力改善球隊表現時，會搵高普代替，令利記因此加快炒左羅渣士。


咁其實利物浦同高普，夾唔夾呢？高普既戰術都眾所周知，係高體力化逼搶同防守反擊，主要用4-2-3-1既排位。而利記本有既戰術，主要係控球戰術，用傳送搵機會攝入對方防線空檔，甚至有時搓到一眾球迷忟，都仲未搓到入去。陣式上就一路都揸唔定主意，4-3-3、4-4-2、3-5-2、3-4-3，無時停。

高普既到黎，以上既風格一定有變。不過，現時陣中既球員主要都比較近技術型、體能並非強項，諸如古天奴(Coutinho)、拉蘭拿(Lallana)等，而且高普會用翼位球員有速度同有傳中功夫，不過利記陣中無乜正宗翼鋒，反而playmaker就一堆、前鋒都一堆。另外，左閘無乜可靠人選，摩蘭奴(Moreno)攻強於守、荷西安歷基(Jose Enrique)質素不足，亦盛傳加盟西布朗。而陣中前鋒如賓迪基(Benteke)、史杜列治(Sturridge)、京斯(Ings)，甚至外借中既巴神巴洛迪利(Balotelli)都係雙前鋒時發揮更佳。鑑於高普曾表示傾向善用陣中球員而非靠收購，可能要靠佢加強相關訓練解決，否則都有足夠時間睇清需唔需要買同買咩人，等到1月轉會窗。

當然，利記請高普，可能都係除左對羅渣士失去信心外，都對控球戰術失去耐性，所以可能都係一個戰術改革既訊號，由控球改為防反、技術型轉體力型。而高普都曾用過如萊斯(Reus)、香川(Kagawa)等不擅體力型踢法既球員，而陣中球員年齡較小，青年軍亦有潛質小將，高普善於發掘球員潛能既特點都比較適合。且睇下高普可以為利記帶黎d乜野沖擊，甚至突破。

btw如果講夾，其實車路士真係同高普都幾夾，陣式上相近、左翼都有個入得波又助得攻既頂級人選、擅長體力型踢法、打防反有效率，講講下甚至同摩佬都幾似，同球員夠fd、又夠投入，甚至當年多蒙特既高峰期都係兩季，之後…
嗯，至少高普長期執教同善用小將方面，現時既摩佬仲需要係相關方面有所突破。

多謝各位不吝賜評，一like一支持，多承指教：
[url=https://www.facebook.com/chelsea.gor.sk]https://www.facebook.com/chelsea.gor.sk[/ur]