淺論盧卡古去曼聯

車路士淺論 於 10/07/2017 發表 收藏文章
最近最大嘅消息莫過於盧卡古(Lukaku)正式轉會去曼聯,之前同盧卡古傳得最行嘅應該就係車路士,愛回家之說瘋傳多時。甚至有指干地(Conte)點名要求球會收購佢,甚至因為買唔到而對高層表示不滿。不過宜家最新嘅消息就係盧卡古已經正式轉會,車路士需要收購前鋒,就必須要向其他目標埋手,例如比洛迪(Belotti)、莫拉達(Morata)等。


其實以盧卡古嘅踢法,筆者已經多次講過並唔適合車路士現時嘅打法,雖然唔知真定假,但係干地竟然咁想要盧卡古,而唔係其他更為靈活嘅前鋒,呢樣比較奇怪,因為佢應該都清楚盧卡古並唔適合佢嘅打法,雖然亦都有可能因為佢會微調戰術,但以盧卡古近年嘅比賽時場上嘅表現,似乎並唔適合干地去用。


相反,其實客觀黎睇佢去曼聯嘅發揮應該會更好,對比起上季曼聯嘅前鋒主力伊巴謙莫域(Ibrahimovic),一黎兩人嘅身高比較接近,盧卡古都會喺前線上做到一個支點嘅作用。而且盧卡古其實把握力亦都唔錯,係曼聯有機會接應後面隊友既傳送,甚至有機會解放到普巴(Pogba)既向前活動空間。雖然佢逗後同伊巴逗後相比,所帶來的影響同發揮唔夠,但係對於適應曼聯嘅戰術應該有一定嘅幫助。而且只要摩連奴(Mourinho)加強佢嘅跑動能力同臨場判斷,佢應該適合曼聯。


不過另外順帶一提,奇怪嘅係每日電訊報、衛報表示因為曼聯買咗車路士嘅目標盧卡古,曼聯係防守中場上嘅目標,轉為買戴亞(Dier)而唔係馬迪(Matic)。其實筆者比較唔明呢一個諗法,因為車路士其實都幾急於放走馬迪,以現時女CEO嘅方針黎睇,佢係想放走一個球員先至買新嘅,所以車路士其實好想放走馬迪,從而追上收購新嘅防守中場嘅進度,例如巴卡約高(Bakayoko)。而且馬迪中場想向前嘅能力唔錯,有一腳長傳功夫,應該同現時曼聯中場人手配合到,其實都適合個戰術,仲要係摩連奴既愛將,而且收購戴亞嘅機會實在太細,呢個推斷都幾唔合理。



多謝各位不吝賜評,一like一支持,多承指教:
https://www.facebook.com/chelsea.gor.sk
標籤: chelsea  man utd  lukaku  

留言


請按此登錄後留言。未成為會員? 立即註冊
  • @michael@ 於 10/07/2017 評論 NO. 1

    戴亞煙幕,馬迪先真。因為而家係車仔急曼聯唔急,之前搶左盧卡古,車仔更急買前鋒所以更心套現。曼聯兜個圈,等你消消氣,再入手。

快捷鍵:←
快捷鍵:→