[淺論歐國盃] 點睇法國

今次講到今屆既主辦國，法國。老老豆豆，筆者今次睇好法國，三線實力頗為平均，而狀態亦都唔錯。係各大聯賽既前列強隊，甚至冠軍球隊都會見到法國球員既身影，而且都係主力分子，可見法國既實力近年都開始漸漸回升，加上狀態大多都唔錯，又是主辦國，筆者認為絕對有力一戰。


法國既弱點位，相信係同德國、比利時比較似既閘位既人腳問題，同中堅位置人選。艾夫拿(Evra)、沙格拿(Sagna)年紀已大，速度不如當打之時，係曼聯同阿仙奴之時咁快，然而，佢地經驗老到，而今季由於祖記左閘艾夫拿屬關鍵一員、而曼城薩巴列達(Zabaleta)受傷，艾夫拿、沙格拿呢對老閘發揮不俗，相信會做到正選，而後備迪治尼(Digne)、查奧列(Jallet)也有相當實力，而中路沙高(Sakho)因為禁藥問題未有判決，未能入選，又有哥斯尼(Koscielny)領銜，但文加拉(Mangala)、拉米(Rami)近況一般，烏迪迪(Umtiti)又經驗未足，相信會按經驗出拉米(不過好似效果麻麻)，或者睇下哥斯尼可唔可以好似甘賓尼咁帶得住文加拉，否則大膽既，可以出烏迪迪一試。門將一定係羅列斯(Lloris)，唔講。
而中前場上，法國就不得了，中路上，有狀態火熱既英超冠軍成員干迪(Kante)、正從新星變緊球星既普巴(Pogba)，而L迪亞拉(L.Diarra)、馬度迪(Matuidi)狀態亦不俗，再數卡巴耶(Cabaye)實力亦強，中場上問題絕對唔大，不過筆者唔明點解選M施素高(N.Sissoko)而非舒尼達連(Schneiderlin)。而前場上，就好睇要點配合，無左賓斯馬(Benzema)，基沙文(Griezmann)、基奧特(Grioud)相信會爭正前一個位，而應該會前者佔優，而馬迪爾(Martial)、比耶(Payet)由於狀態不俗，相信可以佔左右翼一位。如果唔怕將基沙文擺返左路減弱左佢既門前機會，咁佢打左翼、出返銀河唯一打正前都得。(不過有d可惜無拿卡達錫(Lacazette)同賓艾化(Ben Arfa)睇…)


戰術上，相信中前變化空間會比較大，因為可翼可鋒既基沙文、馬迪爾打兩個位都ok，而且高文(Coman)可左可右，而以上幾人同比耶都具速度同技術，要高空大斬又有頂得既基奧特，傳得既比耶。如果唔斬，後面攻守全能既普巴、卡巴耶都射得一腳，不過組織上可能要靠普巴、比耶，因為其他中場人選都偏向防守性，如果二人被盯實，就要靠鋒將既個人能力。當然，艾夫拿、沙格拿都可以後上，二人傳送同後上助攻能力都唔錯，幾個防中都有唔錯防守意識去補位，但體力問題會比較關鍵，要視乎返對手去睇點打。


筆者預計(非心水陣)：
前鋒：馬迪爾、基沙文、比耶
中場：普巴、干迪、馬度迪
後衛：艾夫拿、哥斯尼、拉米、沙格拿門將：羅列斯


多謝各位不吝賜評，一like一支持，多承指教：
https://www.facebook.com/chelsea.gor.sk