淺談英超五強既轉會(下)

車路士淺論 於 18/08/2014 發表 收藏文章
上次講左車路士同曼城呢兩大熱門,今次繼續講埋五大球隊中另外三隊係補強左球隊弱點既收購上,筆者自己既睇法。

黎到利物浦,係賣左蘇亞雷斯(Suarez)後,利物浦需要既係一個組織點、入球點同一個領導攻勢既人,鑑於上季既蘇亞雷斯真係好癲好fit,要維持返相應既攻力係有難度既,需要一定戰術同人手配合,而收購既拉蘭拿(Lallana)解決左組織既問題,而上季都表現上佳既史杜列治(Sturridge)同史達寧(Sterling)、古天奴(Coutinho)就分別要加強自己既入球能力、突破力同發動攻勢既能力,去彌補蘇7離隊既空白位,當然最好就買返個進攻型既球星啦,但好認真以利物浦現況黎睇,都未必可以做到住,不如好好等新球員,例如馬高域(Markovic)等培養默契、發揮好d實力反而仲好,就如上季一樣。加上收購左域奇林拔(Lambert)都可以加強進攻板斧,戰術或者可以更立體更靈活。
而中後場上,收購左安利簡(Emre Can)可以俾謝拉特有個小將輪換同未來接班,收購洛夫雲(Lovren)、[摩蘭奴(Moreno)]同借用文基路(Manquillo)等都係針對實力不足既地方,尤其前場未有領導進攻既人加盟下,後防既重要性更增,洛夫雲既頂上功夫同防線領導力都係改善後防既合理收購。
不過下季係近年第一季打返歐聯,好考驗羅渣士(Rodgers)既輪換功力,不過當然第一季其實唔好太執著於歐聯,當吸收經驗,先打好聯賽,目標入前四更好。


而曼聯方面,雲高爾(van Gaal)雖然係比較重要既"收購",用3-5-2個人覺得無乜問題,曼聯而家係百廢待興,由重新開始,轉打法都唔係問題,但問題係中堅唔夠人又唔夠勁,就…有少少唔太好,始終熱身賽唔同正式英超,第一場就失利,當然咁唔代表咩,但已經顯露左弱點,而艾殊利楊格(Ashley Young)就真心fake哂,又打回原形,可謂又一個費蘭度托利斯(Fernando Torres)。
但打翼衛要既人手其實少左,以曼聯既人腳係夠,加上梳爾(Shaw)係攻守兼備既類型,只要訓練返位置同意識係可以勝任到,不過上季新星贊奴沙(Januzaj)可以要試下打攻中,或者外借左先,因為佢上季都係打翼多,而香川真司(Kagawa)可能就未必留到,因為熱身賽都打得唔算好,有機會再次證明固然係好,但無既就不如離開英超對佢或者仲好,可能佢體格上真係唔岩,但實力係有既,無謂浪費左佢。而查維靴南迪斯(Javier Hernandez)相信有得留,就睇佢想唔想,因為佢已經定左型係超級後備,但佢都唔會無機會打返正選,但首先要再練好傳送同體能,唔係既雲高爾可以係前線買多個都得。
而中場問題上,雖然有左靴里拉(Herrera),但除左本身既費查(Fletcher)外無乜防守型既中中,費蘭尼(Fellaini)又唔係防守好,中場既屏障仲係不足,而且後防都有問題下,防守仲係令人擔心既地方。今季得聯賽打係好,但人腳既數、質、同比例都要好好調配返,睇下雲高爾會唔會補強返防守能力。


阿仙奴既情況都類近,係收購左山齊士(Sanchez)、迪布治(Debuchy)等之後,前場既進攻能力更增,而突破力同技術都好好既佢,係阿記控球好但無乜到肉攻勢既解決方法,要睇返佢幾時融入到,但作用上會比禾確特(Walcott)更佳。
而迪布治係代替沙格拿既代替品,佢既攻守能力都拍得住後者,而以出擊力見稱既佢相信都可以加強側擊,但防守既問題上,左閘都係差d,傑比斯(Gibbs)不夠可靠、蒙尼爾(Monreal)又有所回落,加上中堅人手上華美倫(Vermelan)賣左,但未買返個具質素既中堅。
而防中除左費明尼(Flamini)都無乜硬淨既防守型中場,不過如果雲加(Wenger)有能力將中場既戰術打法做到巴塞咁控球同合理壓迫、唔需要搶波既人既就無問題,但中堅仍係要面對既問題。

一like一支持,多承指教:
https://www.facebook.com/chelsea.gor.sk

如果喜歡我們的文章,請即分享到︰

標籤: man utd  arsenal  liverpool  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→