從費托既變化，看現今球壇對前鋒既要求 精選

近排睇左有篇談及前鋒既文章有感，西班牙亦選左費蘭度托利斯(Fernando Torres)入30人名單，咁不如就講下前鋒既要求既變化。

當年費托係利物浦令對方後衛聞風喪膽，有速度、有技術，射門能力高，可以話係典型技術型9號所需既條件。當時球壇仲係4-2-3-1等陣式同埋控球戰術未興起之前既時代，唔少傳球戰術同反擊戰術，都需要到呢d入球能力極高既前鋒，費托亦因有謝拉特(Gerrard)、沙比阿朗素(Xabi Alonso)等傳球好手既源源不絕既傳送，攻入一個又一個既入球，係西班牙亦同拍檔韋拿(Villa)連連入波贏走歐國盃開創王朝。

然而，後來巴塞既控球戰術興起，令唔少球會仿效，包括以西超雙雄為骨幹既西班牙。同時，因為戰術既變化往往要求球員做多d既野，開始出現"組織型防中"、"進攻型翼衛"，以及筆者落場踢下波時會做既"防守型前鋒"。前鋒除左入波外，開始要做一d例如 幫隊友拉位、去邊路幫手組織、做進攻支點二傳、前場逼搶等等，我地車路士攞歐聯個年，杜奧巴(Drogba)甚至係左閘位置出現過。
費托黎車仔後表現回落，入球率奇低，除左因為佢需要有反擊空間既戰術、信心等問題外，佢作為前鋒，要做既野其實多左，好多時其實都見到佢係邊路同中場位置出現，因為前鋒需要做更多，佢要幫手組織、又要拉位，好多時作為前鋒首要反而唔係入波，而係俾球隊整進攻有效化，等進攻中場同翼鋒入波，射波機會都少，枉論費托本身射門既能力同信心都跌左。

而今季較常擔任正選既伊度奧(Eto'o)亦係類似，不過佢本身都係較有活力同逼搶力既球員，佢又有入球能力，相對下確實比費托更為合適，唔好話佢幾歲，但佢真係仲幾跑得，偷雞又掂，岩哂摩佬。同時球隊傳言既文素基治(Mandzukic)、迪亞高哥斯達(Diego Costa)、卡雲尼(Cavani)都係又當打，有活力又有一定前場逼搶既防守能力既前鋒，而且有唔錯既入球量。

拜仁買利雲度夫斯基(Lewandowski)，某程度都係睇好佢有一定防守力又有入球能力。西甲上皇馬既賓施馬(Benzema)都要拉位俾兩億雙翼，巴塞既美斯(Messi)都係要回後組織既偽9號。不過，意甲就比較特別，開始有伊莫比利(Immobile)、迪斯圖(Destro)甚至東尼(Toni)等入球為主既前鋒。即管睇下前鋒既功能黎緊又會有乜變化。