如果干地留隊,要面對的問題

車路士淺論 於 30/05/2018 發表 收藏文章
近黎令筆者頗感意外既,係對干地(Conte)留隊既呼聲開始有增加既趨勢。當然,其實一直聲討既對象主要係車路士既高層:不配合領隊、對領隊缺乏支持、轉會操作唔理想…諸如此類,不過由於換帥進度不理想,安歷基(Enrique)及薩利(Sarri)因不同問題未能來投,白蘭斯(Blanc)亦看似機會不大。雖然薩利看似機會甚大,甚至已傳出收購名單,但因為高層一貫保守做法,唔肯俾800萬解約金,而且拿玻里自己太心急,早早同名帥安察洛提(Ancelotti)簽約,反而令主動權去左車路士度,而以車路士保守作風,加上以此局面,薩利亦非強到值得一擲千金,又確無照俾既理由,加上炒干地都要俾一筆,所以筆者更傾向留干地。當然,正如標題所示,干地留隊仍有一定問題待解決。


首先當然係成績上。干地既戰術正如諸君所見,已經無上季咁靈,而變陣又唔似好有效。如是者干地就作好決定,到底係大膽改返去4後衛?定基於現有陣式係細節、套路上微調呢?打返4後衛,首先要決定用邊4個,因為現有5個常規人選都要取捨,例如摩西(Moses)唔可以照放右路,要出返艾斯派古達(Azpilicueta)定起用薩柏哥斯達(Zappacosta)呢?中堅點配搭呢?如果打5後衛,中堅、右翼衛要唔要強化人腳呢?需唔需要引入用波既中堅呢?


而前場進攻套路亦要改善,右路進攻上韋利安(Willian)既然不和,而且佢踢法對球隊其中一個好有效既套路:反擊 開始有所拖沓,到底貫徹打防守反擊?定要改打主攻?對前場配置好唔同,尤其中鋒上用莫拉達(Morata)定基奧特(Giroud),出黎既效果都好唔同。

講到韋利安,當然要講埋同球員既關係。好彩既係,其實車路士多數球員同干地其實都無咩,至少無係呢個時候加把口,甚至首席球星夏薩特(Hazard)開腔支持干地,更代為開口表示要求收購球星,而球會確實收購不力,收購進度慢,目標一係被原球會咬實不放人、一係無疾而終,最後買入較次既人選,一係實力稍遜,一係傷癒未回復水準,令球隊表現未如理想,卻反將責任放在領隊身上,動軏更換領隊,卻沒有好好支援領隊,即使轉會大權不欲下放,但自己也要做到野先得架嘛!

咁干地仲有一樣係有少少硬頸,所謂剛極易折,太過企硬,不僅對佢同管理層既溝通有影響,對佢改進自身戰術風格亦有阻礙,尤其臨場調動更失之靈活同及時,如果做得更好,更顯示到佢力挽狂瀾,而管理層既問題更見明顯,咁樣自己拗數都更有本錢。


呢個當然係假設干地留隊既後話,但就算換新領隊,都要警惕留意返呢啲問題,因為車路士高層人腳不變,其實呢類問題相信都會幾常見。


多謝各位不吝賜評,一like一支持,多承指教:
https://www.facebook.com/chelsea.gor.sk

如果喜歡我們的文章,請即分享到︰

標籤: chelsea  conte  

留言

會員
我要評論
請按此登錄後留言。未成為會員? 立即註冊
  • yeungmanu10
    yeungmanu10 於 30/05/2018 評論 NO. 1

    pppqqqqqqqqqqqq

  • yeungmanu10
    yeungmanu10 於 30/05/2018 評論 NO. 2

    pppqqqqqqqqqqqqq

快捷鍵:←
快捷鍵:→